Xalq deputatlari Qo‘qon shahar Kengashining 20-"Tulaboy" saylov okrugidan saylangan deputati O‘.Maxmudov tomonidan saylovchilar bilan o‘tkazilgan uchrashuvlar va fuqarolar qabullari davomida bildirilgan murojaatlar asosida deputatlik so‘rovi yuborildi.

Xususan, "Ganjiravon" mahalla fuqarolar yig‘ini aholisi tomonidan mahalla hududida ichimlik suvi ta’minotini yaxshilash hamda ichimlik suvi minorasini o‘rnatish masalasi ko‘tarildi. Murojaatda hudud aholisini sifatli va uzluksiz ichimlik suvi bilan ta’minlash zarurligi alohida ta’kidlandi.

Mazkur murojaatni atroflicha o‘rganish natijasida deputat tomonidan Qo‘qon shahar hokimining birinchi o‘rinbosari nomiga deputat so‘rovi yuborilib, mahallada ichimlik suvi ta’minotini yaxshilash bo‘yicha zarur chora-tadbirlarni amalga oshirish, ichimlik suvi minorasini o‘rnatish imkoniyatlarini ko‘rib chiqish hamda mas’ul tashkilotlar tomonidan amaliy choralar ko‘rilishi so‘raldi.

Deputat so‘rovida fuqarolarning hayot sifatini yaxshilash, muhandislik-kommunikatsiya infratuzilmasini rivojlantirish hamda aholini sifatli ichimlik suvi bilan ta’minlash masalalari ustuvor yo‘nalishlardan biri ekani qayd etildi.

Fuqarolar tomonidan bildirilgan murojaatlarning ijrosini ta’minlash, ularni qonuniy asosda hal etish hamda natijadorlikka erishish yuzasidan mazkur masala deputat nazoratiga olindi.

Xalq deputatlari Qo‘qon shahar Kengashi