Xalq deputatlari Chilonzor tumani Kengashi deputati Mahmudova Donoxon Artikovna o‘z saylov okrugi hududida navbatdagi o‘rganish ishlarini amalga oshirib, mahalla faollari va fuqarolar bilan uchrashdi. Muloqotlar davomida hududni obodonlashtirish, aholi xavfsizligini ta’minlash hamda mavjud muammolarni bartaraf etishga oid murojaatlar tinglanib, ularning har biri atroflicha o‘rganildi.

Jumladan, fuqaro, 4-uy uyboshisi Baltina tomonidan ko‘p qavatli uy atrofida o‘sayotgan ayrim daraxtlarning yirik shoxlari chirib, qurib qolgani sababli aholi xavfsizligiga jiddiy tahdid yuzaga kelayotgani haqida murojaat bildirildi. Ta’kidlanishicha, daraxtlarning ayrim shoxlari mustahkamligini yo‘qotgan bo‘lib, kuchli shamol yoki boshqa tabiiy omillar ta’sirida istalgan vaqtda sinib tushish ehtimoli mavjud.

Mazkur holat hududda istiqomat qilayotgan fuqarolar, ayniqsa yosh bolalar, keksalar hamda piyodalar hayoti va salomatligi uchun jiddiy xavf tug‘dirishi, shuningdek, yaqin hududda joylashgan transport vositalari va boshqa mol-mulkka zarar yetkazishi mumkinligi qayd etildi.

Shu munosabat bilan hududdagi daraxtlarni mas’ul tashkilot mutaxassislari ishtirokida batafsil ko‘zdan kechirish, avariya holatiga kelgan daraxtlar hamda chirigan va qurigan yirik shoxlarni belgilangan tartibda kesish, sanitariya budash ishlarini amalga oshirish, shuningdek, kelgusida bunday holatlarning oldini olish bo‘yicha zarur choralarni ko‘rish yuzasidan tegishli tashkilotlarga deputatlik so‘rovi yuborilishi belgilandi.