Shofirkon tuman hokimligining katta majlislar zalida Xalq deputatlari Shofirkon tumani Kengashining to‘qson uchinchi sessiyasi bo'lib o'tdi. Unda Xalq deputatlari tuman Kengashi raisi Alisher Fayzilloyev boshqarib borgan sessiya ishida tuman kengashi deputatlari, tegishli tashkilot rahbarlari hamda OAV xodimlari ishtirok etdilar.  

Kun tartibidagi birinchi masala, Shofirkon tumanida 2023-yilning ijtimoiy-iqtisodiy rivojlantirish borasida amalga oshirilgan ishlar va erishilgan natijalar yakuni hamda 2024-yil uchun ustuvor vazifalar va rejalar bo'yicha tuman hokimi Alisher Fayzilloyevning hisoboti tinglandi. 

So‘nggi yillarda Shofirkon tumanida ijtimoiy-iqtisodiy jabhalarni erkinlashtirish, inson qadrini ulug‘lash hamda odamlarning farovon yashashi uchun munosib shart-sharoitlar yaratishga qaratilgan tub islohotlar izchillik bilan olib borilmoqda.

Bu yo'lda O‘zbekiston Respublikasi Prezidentining Farmon va qarorlari, Davlat Rahbari va Hukumat topshiriqlaridagi 2023-yil davomida bajarilishi lozim bo‘lgan nazorat bandlarining ijrosini to‘liq ta’minlanmoqda. 
Alisher Fayzilloyev
Kun tartibidagi 2-masala ya'ni Shofirkon tumanini ishsizlik va korrupsiyadan xoli hududga aylantirish hamda sektorlar rahbarlari tomonidan mahallalarda ishlarni tashkil qilish chora-tadbirlari to‘g‘risida tuman sektor rahbarlarining hisobotlari tinglandi.  

Sektor rahbari tomonidan bildirilgan hisobotlar davomida Shofirkon tumanidagi 50 ta mahallada 3 480 nafar ishsiz fuqarolar (shu jamladan, 10 nafar xotin-qizlar va 11 nafar yoshlar) hamda mehnatga layoqatli 66 nafar nogiron mavjud ekanligi qayd etildi.  

Shuningdek, joriy yilda 57 ta umumta’lim maktabini 1 959 nafar o‘quvchilar (shundan, 845 nafar o‘g‘il bolalar va 1,1 ming nafar qizlar) bitirishi va mehnat bozoriga kirib kelishi kutilmoqda, harbiy xizmatdan qaytadiganlar esa 135 nafarni va migratsiyada qaytib kelganlar 1 320 nafarni tashkil etishi ma'lum qilindi. 

Navbatda keltirilgan kun tartibidagi masalalar yuzasidan mas'ullarning hisobotlari tinglandi. Kun tartibidagi masalalar bo'yicha Xalq deputatlari tuman Kengashi deputatlari muzokara uchun so'zga chiqdilar. 

Xalq deputatlari tuman Kengashi bugungi sessiya mobaynida kun tartibidagi masalalar yuzasidan tegishli qarorlar qabul qilgach, sessiya o‘z ishini yakunladi.