🇺🇿 Xalq deputatlari Uchtepa tumani Kengashining “1-Degrez” okrugi deputati Begjanov Ulug‘bek O‘tkurovich tomonidan saylov okrugidagi fuqarolari bilan uchrashuv tashkil etildi. Mazkur uchrashuv davomida deputatning 2026-yil I chorakdagi faoliyati yuzasidan axborot muhokama qilinib, kelgusidagi ustuvor vazifalar belgilab olindi.

Uchrashuv avvalida deputat tomonidan joriy yilning birinchi choragi davomida amalga oshirilgan ishlar yuzasidan batafsil axborot taqdim etildi. Axborotda qayd etilishicha, o‘tgan davr mobaynida fuqarolardan kelib tushgan murojaatlar asosida yuborilgan barcha deputatlik so‘rovlariga tegishli javoblar olinib, ijrosi nazoratga olingan.

 📁 Shuningdek, yig‘ilishda xalq deputatlari Uchtepa tumani Kengashining 2026-yil 1-apreldagi III-27-28-14-202-K/26-sonli qarori ijrosiga alohida e’tibor qaratildi. Mazkur qarorga muvofiq, mahalla hududidan o‘tuvchi Degrez va Quvnoq ko‘chalarini asfaltlashtirish ishlari rejalashtirilgani ta’kidlandi. Fuqarolar ushbu masala yuzasidan aniqlik kiritishni so‘rashdi. Ushbu masala yuzasidan tuman Obodonlashtirish bo‘limi boshlig‘ining birinchi o'rinbosari Azizjon Nurmuhamedov mazkur ishlar 10 kun muddat ichida amalga oshirilishini ma’lum qildi.

 🌿 Bundan tashqari, tuman obodonlashtirish boshqarmasi tomonidan mahalla hududiga mevali ko‘chatlar yetkazib berish hamda ayrim ko‘chalardagi daraxtlarni butash ishlari bo‘yicha amaliy yordam ko‘rsatilishi bildirildi.

 ✅ Yig‘ilishda tumannur korxonasi rahbari Kamoliddin Azimov ham ishtirok etdi. Fuqarolar tomonidan 106-maktab hududidagi yoritish tizimida mavjud muammolar ko‘tarildi va mazkur masala joyida hal etilib, ishchi guruhlar tomonidan amaliy choralar ko‘rildi. Shuningdek, mahalla hududidagi 4 qavatli uyda yoritish tizimi eskirgani yuzasidan murojaat bildirildi. Mas’ullar tomonidan ushbu muammo ham joriy hafta davomida bartaraf etilishi ma’lum qilindi.

 🧠 Uchrashuv yakunida ko‘tarilgan barcha masalalar yuzasidan tegishli mutasaddilar tomonidan batafsil javoblar berildi. Yig‘ilishda xalq deputatlari Uchtepa tumani Kengashi kotibiyati mudiri Anvar Usmanov hamda kotibiyat bosh mutaxassisi Umidbek Abilovlar ishtirok etdi.