Fevral oyi davomida Xalq deputatlari Ishtixon tumani Kengashi deputatlari tomonidan saylov okruglarida aholi bilan uchrashuvlar o‘tkazilib, kelib tushgan murojaatlar tizimli ravishda o‘rganildi hamda mavjud muammolarni bartaraf etish yuzasidan aniq choralar ko‘rildi.

Jumladan, “O‘zbekiston” mahallasi hududidagi Bobir, Quruvchi hamda Murod Jo‘rayev ko‘chalarini ta’mirlash masalasi deputatlik so‘rovi orqali ko‘tarilib, tuman hokimligi tomonidan mazkur ko‘chalar 2026-yilga mo‘ljallangan dastur asosida bosqichma-bosqich ta’mirlanishi ma’lum qilindi.

Azamat mahallasida suyultirilgan gaz ta’minoti bilan bog‘liq muammo ham deputatlik nazoratiga olinib, tegishli tashkilotlar tomonidan joyiga chiqib o‘rganildi va aholiga belgilangan tartibda gaz yetkazib berilishi ta’minlandi.

“Yangi ravot” va “Hazarbobo” mahallalarini bog‘lovchi yo‘lning ta’mirtalab qismi yuzasidan deputat so‘rovi chiqarilib, qisqa muddat ichida yo‘l holati o‘rganildi hamda avtomobillar harakatini ta’minlash maqsadida avtogreyder yordamida tekislash ishlari amalga oshirildi.

Qo‘chqor Qarshiyev mahallasidagi ayrim ko‘chalarda tabiiy gaz tarmoqlarida yuzaga kelgan sizib chiqish holatlari bartaraf etilib, aholining xavfsizligi ta’minlandi.

Qoraqo‘yli MFY hududida yangi qurilgan ko‘p qavatli uylar uchun maishiy chiqindilarni tashlashga mo‘ljallangan maxsus joy mavjud emasligi aniqlanib, tegishli bo‘limlarga takliflar kiritildi hamda hududga chiqindi konteyneri o‘rnatildi.

Mohpar mahallasida ko‘chmas mulk huquqlarini davlat ro‘yxatidan o‘tkazish masalasida murojaat qilgan fuqarolarga amaldagi qonunchilik talablari asosida huquqiy tushuntirishlar berilib, hujjatlarni rasmiylashtirish tartibi yuzasidan amaliy ko‘mak ko‘rsatildi.

Shuningdek, ayrim mahallalarda tabiiy va suyultirilgan gaz iste’molchilariga gazdan to‘g‘ri va xavfsiz foydalanish bo‘yicha targ‘ibot va tushuntirish ishlari olib borildi.

Tadbirkorlikni qo‘llab-quvvatlash yo‘nalishida ham amaliy ishlar olib borilib, tadbirkor ayolga o‘z faoliyatini kengaytirish maqsadida tijorat bankidan kredit mablag‘larini olishda yordam ko‘rsatildi. Natijada zarur tikuv dastgohlari xarid qilinib, ish o‘rinlari yaratish imkoniyati kengaydi.

Deputatlar tomonidan hududlarda aniqlangan muammolarni bartaraf etish, aholi manfaatlarini himoya qilish va ijtimoiy-iqtisodiy rivojlanishga hissa qo‘shish borasidagi ishlar izchil davom ettirilmoqda.