MÚNÁSIBET

Búgin Ózbekstan Respublikası Prezidenti Shavkat Mirziyoevtiń Oliy Majliske hám kóp milletli xalqımızǵa Múrájatı bolıp ótti. Prezident sońǵı toǵız jılda biz sizler menen, el-xalqımız benen birgelikte úlken rawajlanıw jolın basıp óttik.Ekonomikamız jańadan qáliplesti, bazar qatnasıqların, sociallıq qorǵawdı keńeyttik, nızam ústinligin bekkemledik.Eń áhmietlisi, reformalarımızdıń nátiyjesin hár bir máhálle, hár bir shańaraq hám hár bir insan kúndelikli turmısında sezbekte hám bıyıl tariyxımızda birinshi márte jalpı ishki ónimimiz 145 milliard dollardan astı. Bunday joqarı nátiyjeler xalqımızdıń, bárshemizdiń qanday úlken islerge uqıplı ekenimizdi ayqın kórsetpekte dep atap ótti. Prezidentimiz 2026-jılı ámelge asırılatuǵın eń áhmietli tiykarǵı baǵdarlarǵa ayrıqsha toqtap ótti. Birinshi tiykarǵı baǵdar máhálle infrastrukturasın bunnan bılay da jaqsılaw, olarǵa Jańa Ózbekstan kórinisin alıp kiriwden ibarat. "Jurt abadanlıǵı, bárinen burın, máhálleden baslanadı. Áyne máhálledegi jol, suw, elektr hám transport támiynatı, baqsha, mektep hám shańaraqlıq poliklinikadaǵı sharayatlarǵa qarap, adamlar reformalarımızǵa baha beredi." dep atap ótti. Deputatlarǵa óz okrugindegi mashqalalardı sheshiw ushın 500 milliard sum berilmekte. Bul baǵdarda "jasıl aymaq," "jasıl baǵ" jaratıw boyınsha hár bir deputattıń baslamasına qosımsha 330 million sumnan qaratılatuǵını belgilendi. Sonday-aq "Tiykarǵı maqsetimiz adamlarımızdı turaqlı dáramatlı etiwden ibarat. Pulı bar adam jaqsı kiyiniw hám awqatlanıwǵa, sapalı bilimlendiriw hám qánigeli medicinalıq xızmetten paydalanıwǵa, mazmunlı dem alıwǵa, bir sóz benen aytqanda, abadan jasawǵa umtıladı."- dedi Prezidentimiz. Ekinshi tiykarǵı baǵdar - ekonomikanı texnologiyalıq hám innovaciyalıq ósiw modeline ótkeriw baǵdarında islenetuǵın bir qatar wazıypalarǵa toqtalıp ótti. Mámleketimiz basshısı kapital bazarın ekonomikalıq ósiwdi xoshametlewshi áhmietli institucionallıq baǵana sıpatında belgilep, global depozitariylerdi milliy fond bazarımızǵa alıp kiriw kerek ekenligin atap ótti. Prezidentimiz úshinshi tiykarǵı baǵdar - ishki bazarda talaptı xoshametlew máselesine toqtap ótti. Keyingi bes jılda sırt elli turistlerdiń sanın 2 esege arttırıw, turizm xızmetleriniń kólemin bolsa 20 milliard dollarǵa jetkeriw boyınsha úlken shek qoyılmaqta. Usı maqsette turizm infrastrukturasın rawajlandırıwǵa ayrıqsha itibar qaratıladı hám Xorezm hám Qaraqalpaqstan Respublikasındaǵı arxeologiyalıq estelikler boylap iri turizm aylanbası shólkemlestiriledi. Sonday-aq, Prezident 2026-jıldı "Máhállelerdi rawajlandırıw hám jámietti ilgerletiw jılı," dep járiyalawdı usınıs etti. Bunda aldımızda keń kólemli ámelge asırıw tiyis wazıypalar hám jańalanıwlarda biz deputatlar xalqımız aldında ayanbay xızmet etiwge tayarmız. Xalıq deputatları Qaraózek rayonlıq Keńesi 12-Qarakól saylaw okrugi deputatı, Ózbekstan Ekologiyalıq partiyası rayonlıq Keńesi baslıǵı Kelimbetova Anarxan Sadikovna.