Deputat Karomat Karimova tomonidan A.Navoiy mahallasida saylovchilar bilan uchrashuv tashkil etildi. Ochiq ruhda o‘tgan muloqot davomida 2025-yil mobaynida mahallada amalga oshirilgan ishlar, erishilgan natijalar hamda joriy yilga mo‘ljallangan ustuvor vazifalar yuzasidan batafsil suhbat olib borildi.

Uchrashuv jarayonida fuqarolar tomonidan bir qator dolzarb muammo va takliflar ilgari surildi. Xususan, mahallada yoshlarning bo‘sh vaqtini mazmunli tashkil etish maqsadida bolalar o‘yingohi barpo etish, kadastr masalalarini tartibga solish zarurligi ta’kidlandi.

Shuningdek, “Suvchi” va “Belbog‘li” ko‘chalarida yaroqsiz holga kelib qolgan simyog‘ochlarni zamonaviy beton ustunlarga almashtirish, mahallaga kirish qismidagi katta ariqni betonlashtirish lozimligi qayd etildi. Mazkur ariqdan suv sizib chiqishi oqibatida ayrim xonadonlar va tomorqalarga zarar yetayotgani bildirildi.

Bildirilgan murojaat va takliflar deputat tomonidan atroflicha tinglanib, ularni hal etish yuzasidan tegishli tashkilotlar bilan hamkorlikda amaliy choralar ko‘rilishi ma’lum qilindi.