Xalq deputatlari Zomin tuman Kengashi deputati U.Akkulov tomonidan hududlarda aholi bilan bevosita muloqotni kuchaytirish, ularni o‘ylantirayotgan muammolarni joyida o‘rganish hamda amaliy yordam ko‘rsatish maqsadida navbatdagi sayyor qabul tashkil etildi. 

Sayyor qabul avvalida deputat davlatimiz rahbari tashabbusi bilan yurtimizda amalga oshirilayotgan keng ko‘lamli islohotlar, xususan, hududlarni ijtimoiy-iqtisodiy rivojlantirish, yangi ish o‘rinlari yaratish, tadbirkorlikni qo‘llab-quvvatlash, aholi farovonligini oshirish hamda mahalla institutining rolini yanada kuchaytirish borasida olib borilayotgan ishlar haqida batafsil to‘xtalib o‘tdi.

Shuningdek, tumanda amalga oshirilayotgan bunyodkorlik ishlari, infratuzilma loyihalari hamda aholi murojaatlari asosida hal etilgan masalalar haqida ma’lumot berildi. 

Shundan so‘ng fuqarolarning murojaatlari tinglandi. Sayyor qabul jarayonida ichimlik suvi ta’minoti, ichki yo‘llarni ta’mirlash, bandlik, ijtimoiy yordam, subsidiya va boshqa masalalar yuzasidan murojaatlar bildirildi. 

Ayniqsa, mahalla xotin-qizlar faollari tomonidan oilalarda ajrimlar sonining ortib borayotgani yuzasidan masala ko‘tarildi. Mazkur muammo jamiyat barqarorligi, farzandlar tarbiyasi hamda oilaviy qadriyatlarning mustahkamligiga salbiy ta’sir ko‘rsatishi ta’kidlandi. 

Deputat ushbu masala yuzasidan o‘z takliflarini bildirib, mahallalarda hurmat va obro‘ e’tiborga ega bo‘lgan hoji ota va hoji onalarni, nuroniylarni oilaviy nizolarni bartaraf etish jarayonlariga kengroq jalb qilish zarurligini qayd etdi. Ularning boy hayotiy
tajribasi, pand-nasihatlari va oqilona maslahatlari yosh oilalar o‘rtasida totuvlikni mustahkamlash, ajrimlarning oldini olishda muhim ahamiyat kasb etishi ta’kidlandi. Shuningdek, mahalla faollari, profilaktika inspektorlari hamda tegishli mutasaddi tashkilotlar bilan hamkorlikni kuchaytirish lozimligi bildirildi.

Sayyor qabul davomida bildirilgan barcha murojaatlar tegishli tartibda ro‘yxatga olinib, ayrim masalalar joyida ijobiy hal etildi. Qo‘shimcha o‘rganish talab etiladigan murojaatlar yuzasidan mas’ul tashkilotlarga so‘rovlar yuborilishi hamda ularning ijrosi deputat nazoratiga olinishi belgilandi. 

Fuqarolar bilan ochiq va samimiy muloqot qilish, ularning muammo va takliflarini eshitish hamda amaliy ko‘mak ko‘rsatish deputatlik faoliyatining ustuvor yo‘nalishlaridan biri ekani yana bir bor ta’kidlandi.

Sayyor qabullar belgilangan reja asosida davom ettiriladi.