Qaraqalpaqstan Respublikası Joqarǵı Keńesiniń deputatı, ÓzXDP frakciyasınıń aǵzası B.Utambetova, Xalıq deputatları rayonlıq Keńesiniń deputatı S.Namenov Moynaq rayonı 3-sanlı ulıwma orta bilim beriw mektebinde boldı.

 Mektepte bilimlendiriwdiń sapasın arttırıw, jaslardıń zamanagóy bilim hám kónlikpelerin rawajlandırıw maqsetinde "Mártlik mektebi" hám STEM klassınıń jumısı úyrenildi. Process dawamında oqıwshılar ushın jaratılǵan sharayatlar, sabaqlardıń shólkemlestiriliwi hám innovaciyalıq qatnaslarǵa ayrıqsha itibar qaratıldı.

STEM baǵdarında shólkemlestirilgen ámeliy sabaqlar oqıwshılardıń texnologiya, injenerlik, matematika hám tábiyǵıy pánlerge bolǵan qızıǵıwshılıǵın arttırıwǵa xızmet etpekte. Sonday-aq, zamanagóy úskeneler menen támiyinlengen klasslarda oqıwshılardıń erkin pikirlewi hám dóretiwshilik qatnasların rawajlandırıw ushın keń imkaniyatlar jaratılǵan.

"Mártlik mektebi" jumısı dawamında jaslardı watansúyiwshilik ruwxında tárbiyalaw, tártip-intizam hám juwapkershilik sezimin qáliplestiriw baǵdarında alıp barılıp atırǵan jumıslar da unamlı bahalandı.

Keleshekte bul baǵdardaǵı jumıslardı bunnan bılay da jetilistiriw, aldınǵı tájiriybelerdi ǵalaba en jaydırıw hám oqıwshılar ushın zamanagóy bilimlendiriw ortalıǵın keńeytiw boyınsha tiyisli usınıslar berildi.