Xalq deputatlari Ishtixon tumani Kengashining 2026-yil 6-apreldagi VII-20-29-7-95-K/26-son qarori bilan tumanda jinoyatchilikning oldini olish, kriminogen vaziyatni yaxshilash va mahallalarda xavfsizlikni ta’minlash bo‘yicha yangi vazifalar belgilandi.

Mazkur qaror oddiy tavsiya yoki yig‘ilish bayoni emas. Qaror orqali tuman prokuraturasi, hokimlik, ichki ishlar, sog‘liqni saqlash, bandlik, mahalla va boshqa mas’ul tashkilotlarga aniq vazifalar yuklatildi hamda ularning ijrosi Xalq deputatlari Ishtixon tumani Kengashi nazoratiga olindi.

Endilikda:

🔹 jinoyatchilik yuqori bo‘lgan mahallalarda alohida nazorat o‘rnatiladi;

🔹 “qizil” va “sariq” toifadagi hududlarda manzilli chora-tadbirlar amalga oshiriladi;

🔹 ijtimoiy muammoli, ishsiz, nazoratsiz va xavf guruhidagi fuqarolar bilan individual ishlash kuchaytiriladi;

🔹 spirtli ichimlik, oilaviy muammo, ishsizlik va boshqa sabablar tufayli jinoyat sodir bo‘lishining oldini olish bo‘yicha amaliy ishlar olib boriladi;

🔹 mahallalarda jinoyatlarni barvaqt aniqlash va oldini olish tizimi kuchaytiriladi.

Eng muhimi, ushbu masalalar endi faqat biror tashkilotning ichki ishi bo‘lib qolmaydi. Xalq deputatlari Ishtixon tumani Kengashi qarori bilan barcha mas’ul idoralar birgalikda ishlashi, har bir topshiriqning bajarilishi va natijasi uchun javob berishi belgilandi.

❔ Bu qaror fuqarolar uchun nimani anglatadi?

✅ mahallalarda xavfsizlik kuchayadi;

✅ jinoyatchilik ko‘payayotgan hududlarda tezkor choralar ko‘riladi;

✅ muammoli oilalar va fuqarolar bilan oldindan ishlanadi;

✅ fuqarolarning tinch va osoyishta yashashi uchun aniq vazifalar belgilandi.

Demak, Kengash qarori orqali tumandagi xavfsizlik masalalari doimiy nazoratga olinib, fuqarolarning osoyishta hayoti va mahallalarda tinch muhitni ta’minlash uchun huquqiy asos yaratildi.