2026-yil 13-may kuni Parkent tumani hokimligi majlislar zalida korrupsiyaga qarshi kurashish va uning oldini olish masalalariga bag‘ishlangan yig‘ilish bo‘lib o‘tdi. Unda tuman hokimi, deputat Elmurod Po‘latov, tuman Kengashi raisi Faxriddin Dadamatov, tuman prokurori Qaxramon Mirsagatov hamda tumandagi mahalla raislari ishtirok etdi. Yig‘ilish davomida korrupsiyaning oldini olish va unga qarshi kurashish borasidagi dolzarb masalalar atroflicha muhokama qilindi. Xususan, tuman prokurori Qaxramon Mirsagatov tomonidan korrupsiyaning jamiyat rivojiga salbiy ta’siri, aholining davlat idoralariga bo‘lgan ishonchini susaytirishi, shuningdek iqtisodiy va ijtimoiy taraqqiyotga jiddiy putur yetkazishi haqida batafsil ma’lumot berildi. Tuman hokimi, deputat Elmurod Po‘latov o‘z nutqida korrupsiyaviy holatlarga yo‘l qo‘ymaslik, barcha sohalarda shaffoflik va
ochiqlikni ta’minlash, fuqarolarning murojaatlari hamda muammolariga mas’uliyat bilan yondashish zarurligini alohida ta’kidladi. Tuman Kengashi raisi Faxriddin Dadamatov esa o‘z nutqida mahalla raislari hokimning joylardagi vakili sifatida aholi o‘rtasida korrupsiyaga qarshi kurashish zarurligini targ‘ib etishi, korrupsiyaga qarshi kurashish umummilliy vazifa ekani, bu illatga nisbatan murosasiz bo‘lish hamda mamlakatimizda bu borada amalga oshirilayotgan islohotlar haqida to‘xtalib o‘tdi. Yig‘ilish yakunida tumanda korrupsiyaga qarshi kurashish samaradorligini oshirish, profilaktik tadbirlarni kuchaytirish hamda bu borada amalga oshirilishi lozim bo‘lgan aniq vazifalar belgilab olindi.