Новости
Последние новости
Mitan MFYda hokim yordamchisi faoliyati va kambag‘allikni qisqartirish borasidagi ishlar o‘rganildi
Xalq deputatlari Piskent tumani Kengashi deputati B. Ozodov tomonidan Piskent tumani Mitan MFYda hokim yordamchilari faoliyati hamda aholini kambag‘allikdan chiqarish borasida amalga oshirilayotgan ishlar samaradorligi yuzasidan o‘rganish o‘tkazildi.
O‘rganish davomida mahallada kambag‘allikni qisqartirish va aholi bandligini ta’minlash, fuqarolarni tadbirkorlikka jalb etish, imtiyozli kreditlar ajratish, kasb-hunarga o‘qitish hamda doimiy daromad manbalarini yaratishga qaratilgan chora-tadbirlar atroflicha tahlil qilindi.
O‘rganish jarayonida quyidagi holatlar qayd etildi:
Imtiyozli kreditlar ajratilishi: Mazkur mahallaga "Agrobank" ATB biriktirilgan bo‘lib, imtiyozli kredit olish istagida 29 nafar fuqaro tomonidan ariza topshirilgan. O‘rganish kuniga qadar ularning 17 nafariga kredit ajratilgan, 12 nafar fuqaroning murojaati esa belgilangan mezonlar asosida rad etilgan. Kredit ajratish jarayonlarining shaffofligi, fuqarolarga berilayotgan tushuntirish ishlari hamda rad etilgan murojaatlar yuzasidan tegishli ma’lumotlar olindi.
Xotin-qizlar bandligi va kasb-hunarga o‘qitish: Mahallada xotin-qizlarning daromad manbalarini kengaytirishga alohida e’tibor qaratilmoqda. Jumladan, 15 nafar xotin-qiz bepul asosda massaj xizmati bo‘yicha kasb-hunarga o‘qitilayotgani, mashg‘ulotlar yakunida ularning mehnat bozorida o‘z o‘rnini topishi hamda o‘zini o‘zi band qilishi uchun zarur ko‘nikmalar berilayotgani ta'kidlandi.
O‘rganish yakunlari bo‘yicha hokim yordamchilari faoliyati samaradorligini yanada oshirish, kredit mablag‘laridan samarali foydalanish, tadbirkorlikni rivojlantirish hamda xotin-qizlar va yoshlarning bandligini ta’minlash yuzasidan tegishli tavsiya va takliflar bildirildi.