Xalq deputatlari Qo‘qon shahar Kengashi deputati O.Bozorov tomonidan saylovchilar murojaatlarini o‘z vaqtida ko‘rib chiqish hamda hududdagi infratuzilma bilan bog‘liq muammolarni bartaraf etish maqsadida navbatdagi deputatlik so‘rovi yuborildi.

Deputatning "Degrezlik" mahalla fuqarolar yig‘inida o‘tkazgan uchrashuvlari va joyiga chiqib olib borgan o‘rganishlari davomida aholi tomonidan Abdurahmon Jomiy hamda unga tutash ko‘chalardagi elektr uzatish simyog‘ochlari uzoq yillardan buyon yangilanmagani, ularning eskirgani sababli elektr ta’minotida uzilishlar va xavfsizlik bilan bog‘liq muammolar yuzaga kelayotgani bo‘yicha murojaatlar bildirildi.

Mazkur murojaatlar yuzasidan O‘zbekiston Respublikasining “Xalq deputatlari viloyat, tuman va shahar Kengashi deputatining maqomi to‘g‘risida”gi Qonuni talablariga muvofiq, Qo‘qon shahar hokimining qurilish, to‘siqsiz muhit yaratish, kommunikatsiyalar, kommunal xo‘jalik, ekologiya va ko‘kalamzorlashtirish masalalari bo‘yicha o‘rinbosari nomiga deputatlik so‘rovi yuborildi.

Deputatlik so‘rovida mazkur hududdagi eskirgan simyog‘ochlarni yangilash bo‘yicha amalga oshirilayotgan ishlar, ushbu ko‘chalarni tegishli dasturlarga kiritish imkoniyatlari hamda ishlarni bajarish muddatlari yuzasidan asoslantirilgan ma’lumot taqdim etish so‘ralgan.

Mazkur masala deputat nazoratiga olingan bo‘lib, uning ijrosi yuzasidan amalga oshiriladigan ishlar va natijalar haqida jamoatchilikka qo‘shimcha ma’lumotlar berib boriladi.

Xalq deputatlari Qo‘qon shahar Kengashi