18.05.2026-jıl. Ózbekstan Ekologiyalıq partiyası Taxtakópir rayonlıq partiya shólkemi Keńesiniń baslıǵı B.Baymbetova hámde Xalıq deputatları rayonlıq Keńesine usı partıyadan saylanǵan deputat Almagul Pirjanova "Ózbekstan" mákan puqaralar jıyını aymaǵında jasawshı puqara Jabbarbergenov Esemurattiń shańaraǵında bolıp, qıytaq jerden nátiyjeli paydalanıw jaǵdayı úyrenildi.

19.05.2026-jıl. Xalıq deputatları Taxtakópir rayonlıq Keńesine Xalıq demokratiyalıq partiyasınan deputat Jaliev Qabılbek Abdiganievich rayonlıq Elektr támiyinlewshi kárxanasına hám rayonlıq Ekologiya, qorshaģan ortalıqtı qorģaw hám ıqlım ózgeriwi bólimi deputatlıq soraw jolladı. 2026-jıl 19-may kúngi 61-ds-366-26-sanlı deputat sorawında "Dáwir" máhállesindegi D.Gúzarı kóshesindegi 1-2-sanlı kóp qabatlı jaylarda jasawshı puqaralar úyiniń aldınan ótip turģan elektr tarmaqları arasında ósip turģan tereklerdi tártipke keltiriw boyınsha kórsetilgen.

20.05.2026-jıl. Xalıq deputatları Taxtakópir rayonlıq Keńesinde ÓzLiDeP deputatlıq toparınıń májilisi bolıp ótti. Májilis kún tártibine Ózbekstan Respublikası Prezidentiniń 2023-jıl 26-maydaǵı "Mektepke shekemgi hám mektep bilimlendiriwi ministrligi hám onıń sistemasındaǵı shólkemlerdiń jumısın nátiyjeli shólkemlestiriw ilajları haqqında"ǵı PQ-79-sanlı Pármanınıń orınlanıwı boyınsha ámelge asırılǵan jumısları haqqındaǵı esabat tıńlaw máselesi kirgizildi.

21.05.2026-jıl. "Kitapxanashılar kúni" múnásibeti menen bayram ilajı shólkemlestirildi. Usı múnásibet penen 1-sanlı mektebde ótkerilgen bayram ilájında rayonlıq Keńeske ÓzLiDEP partıyasınan deputat N.Azbergenov qatnastı.

22.05.2026-jıl. Xalıq deputatları Taxtakópir rayonlıq Keńesiniń Keńesiniń Agrar, suw xojalıģı máseleleri hám ekologiya boyınsha turaqlı komissiyası májilisi bolıp ótti. Májilisti turaqlı komissiya baslıǵı S.Seytnazarov basqarıp bardı.
Kún tártibinde Taxtakópir rayonı aymaģınan “Meniń baģım” joybarın ámelge asırıw hám shólkemlestiriw ilajları haqqındaǵı másele qarap shıǵılıp, rayonlıq Keńestiń sessiyasına usınıw haqqında sheshim qabıl etildi.