Мойнақта Өзбекстан Халық демократиялық партиясының 35 жыллығына бағышланған илаж өткерилди

Өзбекстан Халық демократиялық партиясы дүзилгениниң 35 жыллығы мүнәсибети менен Мойнақ районында байрам илажы болып өтти. Онда партия белсендилери, депутатлар ҳәм мийманлар қатнасып, партияның тарийхый жолы ҳәм бүгинги күндеги искерлиги туўралы сөз жүритилди.

Илажда партияның 1991-жыл 1-ноябрьден баслап басып өткен жолы, социаллық әдилликти тәмийинлеў ҳәм социаллық қорғаўға мүтәж халық қатламларының мәплерин қорғаўға қаратылған жумысы сәўлелендирилген видеоролик көрсетилди.

Усы жылдың 1-октябрь жағдайына бола, Мойнақ районында партия ағзаларының саны 3 006 ды қурап, олар 31 басланғыш партия шөлкемине бирлескен. 2024-жылғы сайлаўлар нәтийжелерине бола, районнан Қарақалпақстан Республикасы Жоқарғы Кеңесине 1 депутат, Халық депутатлары Мойнақ районлық Кеңесине 3 депутат сайланған. Олардың жумысында сайлаўшылар менен пикирлесиў, халықтың мүрәжатларын үйрениў ҳәм әҳмийетли мәселелердиң шешимине жәрдемлесиў әҳмийетли орын ийелейди.

Илажда Өзбекстан ХДП Қарақалпақстан Республикалық Кеңеси баслығы, Карақалпақстан Республикасы Жоқарғы Кеңесиндеги партия фракциясы басшысы Халилла Ешимбетов, Жоқарғы Кеңес депутаты, партия фракциясы ағзасы Бибихан Утамбетова ҳәм Халық депутатлары Мойнақ районлық Кеңеси секретариаты баслығы, партия депутатлық топарының ағзасы Кунсулу Насырова қатнасып, юбилей мүнәсибети менен қутлықлаў сөзлерин билдирди.

Байрам шеңберинде партия идеяларын үгит-нәсиятлаў ҳәм электорат мәплерин қорғаўда белсендилик көрсеткен бир топар мойнақлы партия ағзаларына Өзбекстан ХДП Орайлық Кеңеси баслығы атынан "Ўзбекистон Халқ демократик партияси ифтихори" көкирек белгиси, Ҳүрмет жарлықлары ҳәм естелик саўғалары тапсырылды.