Xalq deputatlari Shovot tumani Kengashi kotibiyati mudiri, 24-Gulshan saylov okrugi deputati Masharipov Izzat Masharipovich hamda 1-Komiljon Otaniyozov saylov okrugi deputati Kariyev Mansur Omangaldiyevich o‘z saylov okruglarida mahalla yettiligi vakillari bilan birgalikda xonadonma-xonadon yurib, fuqarolar bilan ochiq muloqot o‘tkazdilar.
O‘rganishlar davomida aholini qiynayotgan dolzarb masalalardan biri suyultirilgan gaz ta’minoti bilan bog‘liq muammolar ekani aniqlandi. Fuqarolar tomonidan mazkur masala yuzasidan qator murojaatlar bildirildi.
Muammoni joyida o‘rganish va unga yechim topish maqsadida kotibiyat mudiri I. Masharipov hamda deputat M. Kariyev “HUDUDGAZTA’MINOT” AJning “Hududgaz Xorazm” gaz ta’minoti filiali Shovot gaz to‘ldirish shoxobchasida o‘rganish olib bordilar.
O‘rganish davomida shoxobchada aholini suyultirilgan gaz bilan ta’minlash ishlari uzluksiz olib borilayotgani ma’lum bo‘ldi. Mutasaddilarning ta’kidlashicha, so‘nggi kunlarda gaz hajmining vaqtinchalik kamayishi kuzatilgan bo‘lib, yaqin kunlarda ta’minot to‘liq me’yoriga qaytishi kutilmoqda.
Deputatlar tomonidan mazkur masala deputatlik nazoratiga olinib, aholini barqaror suyultirilgan gaz bilan ta’minlash yuzasidan monitoring ishlari davom ettirilishi qayd etildi.