Qurilish sohasi mamlakatimiz iqtisodiy taraqqiyotining muhim yo‘nalishlaridan biri hisoblanadi. Ushbu sohada amalga oshirilayotgan islohotlar natijasida yangi uy-joylar, ijtimoiy obyektlar hamda zamonaviy infratuzilma inshootlari barpo etilmoqda.
Selektor yig‘ilishida belgilab berilgan vazifalar, avvalo, qurilish ishlarida sifat va samaradorlikni ta’minlash, mablag‘lardan oqilona foydalanish, obyektlarni o‘z vaqtida foydalanishga topshirish hamda zamonaviy qurilish materiallaridan keng foydalanishga qaratilgani bilan ahamiyatlidir. Mazkur vazifalar ijrosi hududlarda ham qurilish jarayonlariga mas’uliyat bilan yondashishni, har bir bunyodkorlik ishida xalq manfaatlarini ustuvor qo‘yishni talab etadi. Sifatli qurilish — bu nafaqat yangi binolar barpo etish, balki aholi uchun munosib yashash sharoitini yaratish va kelajak avlodlar uchun mustahkam poydevor bunyod etish demakdir.
Shu bois, belgilangan chora-tadbirlarning amaliy ijrosini ta’minlash, deputatlik nazoratini kuchaytirish hamda qurilish sohasida ochiqlik va mas’uliyatni yanada oshirish ustuvor vazifalardan biri bo‘lib qoladi.

Xalq deputatlari Tuproqqal’a tuman Kengashi deputati
M. Yarashev