3-SONLI TEXNIKUMDA KASBGA O‘QITISH JARAYONI BILAN TANISHILDI

O‘zbekiston Respublikasi Oliy Majlisi Senatining Fan, ta’lim va sog‘liqni saqlash masalalari qo‘mitasi raisi O. Mamatkarimov, Namangan viloyati Kengashi Kotibiyati mudiri T. Gapparov, Xalq deputatlari Namangan shahar Kengashi raisi R. Isakov, shahar Kengashi Kotibiyati mudiri N. Ubaydullayev hamda Kotibiyat bosh mutaxassislari A. Nurmatov va M. Abdulmajidov tomonidan Namangan shahridagi 3-sonli texnikumda kasbga o‘qitish jarayoni bilan tanishildi.

Tashrif davomida texnikumda kasbiy ta’limni tashkil etish, o‘quvchilarga zamonaviy kasb-hunarlarni o‘rgatish, nazariy bilimlarni amaliy mashg‘ulotlar bilan uyg‘unlashtirish hamda kasbiy ko‘nikmalarni shakllantirish borasida amalga oshirilayotgan ishlar ko‘rib chiqildi.

Shuningdek, o‘quvchilar uchun yaratilgan shart-sharoitlar, o‘quv-amaliy mashg‘ulotlar o‘tkaziladigan xonalar va ustaxonalarning holati, moddiy-texnik baza hamda ta’lim jarayonida zamonaviy yondashuvlardan foydalanish masalalariga e’tibor qaratildi.

Kasbiy ta’lim sifatini oshirish, yoshlarni mehnat bozori talablariga mos kasblarga tayyorlash, bitiruvchilarning bandligini ta’minlash va ularni tadbirkorlik faoliyatiga yo‘naltirish yuzasidan fikr almashildi.

Mazkur o‘rganish Mahalliy Kengash deputati faoliyatining eng muhim 24 ta yo‘nalishi bo‘yicha tavsiyalar hamda Kengashning 162 ta qonun hujjatini doimiy komissiyalar kesimidagi taqsimoti doirasida yoshlarning kasbiy ta’lim olishi va bandligini ta’minlash vazifalari bilan uzviy bog‘liqdir.

Jumladan, “Ta’lim to‘g‘risida”gi O‘zbekiston Respublikasi Qonuni (O‘RQ-637-son, 2020-yil 23-sentabr) hamda “Aholi bandligi to‘g‘risida”gi O‘zbekiston Respublikasi Qonuni (O‘RQ-642-son, 2020-yil 20-oktabr) talablaridan kelib chiqib, yoshlarni kasbga tayyorlash va ularning mehnat faoliyatiga kirishish imkoniyatlarini kengaytirish masalalariga e’tibor qaratildi.

O‘rganish yakunida kasbiy ta’lim sifatini yanada oshirish, amaliy mashg‘ulotlar samaradorligini kuchaytirish hamda bitiruvchilar bandligini ta’minlashga qaratilgan ishlarni izchil davom ettirish yuzasidan tegishli tavsiya va vazifalar belgilab olindi.