Xalq deputatlari Chilonzor tumani Kengashining Ijtimoiy soha, yoshlar siyosati, madaniyat va sport masalalari bo‘yicha doimiy komissiyasi raisi Nazirov Madaminjon Ma’rufjon o‘g‘li hamda komissiya a’zosi Xidiyatulina Rima Rashitovna tomonidan tumandagi umumta’lim maktablarida sport infratuzilmasining holatini o‘rganish ishlari olib borildi.

O‘rganish davomida maktab sport zallarining mavjudligi va umumiy holati, ularning moddiy-texnik ta’minoti, sport mashg‘ulotlarini tashkil etish uchun zarur bo‘lgan sport anjomlari bilan jihozlanganlik darajasi hamda mavjud jihozlarning foydalanishga yaroqlilik holatiga e’tibor qaratildi.

Shuningdek, o‘quvchilarning jismoniy tarbiya mashg‘ulotlarini sifatli tashkil etish, sport bilan shug‘ullanishlari uchun munosib shart-sharoitlar yaratish hamda sport zallari va anjomlaridan samarali foydalanish masalalari ko‘rib chiqildi.

Mazkur o‘rganishdan ko‘zlangan maqsad — umumta’lim maktablarida sport infratuzilmasining holatini baholash, mavjud muammolarni aniqlash va ularni bartaraf etish yuzasidan tegishli choralar ko‘rilishiga ko‘maklashishdan iborat.