Xalq deputatlari tuman Kengashining 2026-yilga mo‘ljallangan ish rejasiga muvofiq O‘zbekiston Liberal demokratik partiyasidan saylangan deputat B.Azmetov tomonidan tumanning “S.Xondayliqiy” mahallasida joylashgan 10-sonli umumta’lim maktabining kuz-qish mavsumiga tayyorgarlik holati yuzasidan o‘rganish o‘tkazildi.

🔺O‘rganish davomida ta’lim muassasasida o‘quvchilar va pedagoglar uchun kuz-qish mavsumida zarur sharoitlarni ta’minlash, isitish tizimining texnik holati hamda yoqilg‘i zaxirasining yaratilganligiga alohida e’tibor qaratildi. Xususan, maktabning qozonxonasi ko‘zdan kechirilib, uning texnik holati soz ekani aniqlandi. Isitish tizimi ham ishchi holatda bo‘lib, sovuq kunlarda maktab xonalarini belgilangan me’yorlarda isitish imkoniyati mavjudligi qayd etildi.

🔺Shuningdek, kuz-qish mavsumini barqaror o‘tkazishda muhim ahamiyatga ega bo‘lgan yoqilg‘i masalasi ham o‘rganildi. Maktabda mavsum davomida foydalanish uchun zarur miqdorda ko‘mir zaxirasi yaratilgani ma’lum bo‘ldi. O‘rganish jarayonida qozonxona va isitish tizimining mavsum davomida uzluksiz ishlashini ta’minlash, mavjud jihozlarni muntazam nazorat qilish hamda zarur hollarda profilaktik-texnik ishlarini o‘z vaqtida amalga oshirish masalalariga e’tibor qaratildi.

🔺Deputat tomonidan maktab ma’muriyati bilan suhbatlashilib, kuz-qish mavsumi davomida ta’lim jarayonini uzluksiz tashkil etish, o‘quvchilar uchun qulay va xavfsiz muhitni ta’minlash bo‘yicha amalga oshirilayotgan ishlar muhokama qilindi.