🌱 Davlatimiz rahbari Shavkat Mirziyoyevning Qoraqalpogʻiston Respublikasiga tashrifi doirasida hududning ijtimoiy-iqtisodiy rivojlanishi, aholi bandligini ta’minlash va kambagʻallikni qisqartirish borasida amalga oshirilayotgan ishlar bilan yaqindan tanishuvi barchamizni ulkan marralar sari ruhlantirdi. Xususan, Kegeyli tumanida Kambagʻallikni qisqartirish va bandlik vazirligi tashabbusi bilan barpo etilgan yangi issiqxona majmuasi faoliyati mamlakatimizda “yashil” iqtisodiyotni joriy etishning chinakam namunasi bo‘ldi.

🌎 O‘zbekiston Ekologik partiyasining asosiy maqsadlaridan biri – atrof-muhitni muhofaza qilish, tabiiy resurslardan oqilona foydalanish va ekologik toza texnologiyalarni hayotimizning barcha jabhalariga tadbiq etishdir. Kegeylidagi mazkur loyiha partiyamiz ilgari surayotgan g‘oyalarning amaldagi yorqin ifodasidir.

🌞 Birinchidan, qayta tiklanuvchi energiya manbalaridan foydalanish. Majmuada hududning ekologik barqarorligini ta’minlash maqsadida resurstejamkor texnologiyalarga alohida e’tibor qaratilgani, xususan, quvvati 100 kilovatt boʻlgan quyosh panellari oʻrnatilgani tahsinga sazovor. Ushbu yashil energiya manbai issiqxonaning kundalik ehtiyojini to‘liq qoplashi orqali ham iqtisodiy, ham ekologik samaradorlikni ta’minlaydi, atmosferaga zararli chiqindilar chiqishining oldini oladi.

🌿 Ikkinchidan, mavjud ekologik resurslardan oqilona foydalanish va bioxilmaxillikni qo‘llab-quvvatlash. Issiqxona yaqinida joylashgan 350 metrlik zovur (drenaj) tarmog‘idan unumli foydalanilib, 500 bosh Braziliyadan keltirilgan “Favorit” naslli oʻrdaklarni boqish yo‘lga qo‘yilgani o‘ziga xos innovatsion yondashuvdir. Suv havzalarida parrandachilikni rivojlantirish nafaqat oilalar uchun qo‘shimcha daromad, balki zovur suvlarining biologik tozalanishiga ham ijobiy ta’sir ko‘rsatadi. Bu esa qishloq xo‘jaligida ekotizimni muvozanatda saqlashning eng maqbul usullaridan biridir.

🍃 Uchinchidan, ijtimoiy-ekologik mas’uliyat va barqaror bandlik. “Ijtimoiy reyestr”dagi 50 ta ehtiyojmand oilaga 10 sotixdan issiqxona yerlari ajratilishi, ularga “lider tadbirkor” tomonidan qishloq xo‘jaligi mahsulotlarini yetishtirish sirlari, yer va suv resurslaridan unumli foydalanish o‘rgatilishi “yashil ish o‘rinlari”ni yaratish yo‘lidagi ulkan qadamdir. Majmuada yiliga 1000 nafar fuqaroning issiqxona xoʻjaligi boʻyicha oʻqitilishi ekologik savodxonlikni oshirish va dehqonchilik madaniyatini yuksaltirishga bevosita xizmat qiladi.

Kegeyli tumanidagi ushbu tajriba bugungi kun tadbirkori faqat o‘z foydasini emas, xalq manfaatini, qolaversa, tabiatni asrashni ham o‘ylaydigan haqiqiy vatanparvar bo‘lishi kerakligini isbotlab turibdi.
Biz, Xalq deputatlari Amudaryo tuman Kengashidagi Ekologik partiya deputatlari, o‘z faoliyatimizda bu kabi ilg‘or tajribalarni tumanimizda ham keng ommalashtirishni maqsad qildik. Amudaryo tumanidagi ehtiyojmand oilalarni qo‘llab-quvvatlashda aynan shunday resurstejamkor, quyosh energiyasiga asoslangan va ekologik xavfsiz issiqxonalar tarmog‘ini yaratish bo‘yicha mahalliy kengashda yangi tashabbuslarni ilgari suramiz.

📌Shuxrat MATIRZAYEV,
O‘zbekiston Ekologik partiyasidan saylangan Xalq deputatlari Amudaryo tuman Kengashi deputati