Xalq deputatlari Termiz shahar Kengashining navbatdagi sessiyasiga tayyorgarlik ko‘rish, shahar iqtisodiyoti hamda aholi farovonligiga daxldor masalalarni tahlil qilish maqsadida Kengash doimiy komissiyalarining qo‘shma yig‘ilishi o‘tkazildi.

Unda doimiy komissiyalar raislari, ekspert guruhi a’zolar, deputatlar, Kengash kotibiyati mas’ullari hamda tegishli tashkilot va idoralar rahbarlari ishtirok etdi.

Yig‘ilishda Termiz shahar Kambag‘allikni qisqartirish va bandlikka ko‘maklashish bo‘limi boshlig‘i F.Mengliyevning 2026-yil II choragi davomida amalga oshirilgan ishlar yuzasidan hisoboti tinglandi.
Yig‘ilishning asosiy masalalaridan biri O‘zbekiston Respublikasi Prezidentining 2026-yil 5-fevraldagi PQ–49-son “2026-yilda hududlarni yangicha yondashuvlar asosida rivojlantirish orqali aholi daromadini oshirish, barqaror ish o‘rinlarini yaratish hamda kambag‘allikni qisqartirishga oid qo‘shimcha chora-tadbirlar to‘g‘risida”gi qarori ijrosi bo‘ldi.

Mazkur qarorga asosan 2026-yilda Termiz shahrida 29,2 ming nafar aholini bandligini ta’minlash rejalashtirilgan. Shundan:

🔹 7,2 ming nafar aholini doimiy ish o‘rinlariga joylashtirish;

🔹 18,8 ming nafar aholining daromadini oshirish;

🔹 3,2 mingta ish o‘rnini “soyadan chiqarish” vazifalari belgilangan.

Mazkur vazifalar ijrosini ta’minlash maqsadida ishlab chiqilgan dastur Xalq deputatlari Termiz shahar Kengashining 2026-yil 9-fevraldagi VII-18-14-8-121-K/26-sonli qarori bilan tasdiqlangan.

📈 2026-yil yanvar–iyun oylarida 14 384 nafar aholini yangicha yondashuvlar asosida daromadli mehnat bilan band qilish rejalashtirilgan bo‘lsa, amalda ushbu ko‘rsatkich 116 foizga bajarilib, 20 968 nafar fuqaroning bandligi ta’minlangan.

Shundan:

✅ Doimiy ish o‘rinlariga joylashtirish rejasi 3 214 nafar bo‘lib, amalda 131 foizga bajarildi va 4 211 nafar fuqaro ish bilan ta’minlandi.

Jumladan:

🔹 investitsiya loyihalari hisobidan — 168 nafar;

🔹 xizmat ko‘rsatish va servis loyihalari hisobidan — 1 517 nafar;

🔹 qishloq xo‘jaligi sohasida — 17 nafar;

🔹 qurilish sohasida — 163 nafar aholi bandligi ta’minlandi.

💳 Shuningdek, 1 795 nafar aholini moliyaviy qo‘llab-quvvatlash rejalashtirilgan bo‘lib, amalda 1 842 nafar fuqaro kredit, subsidiya, ssuda va boshqa moliyaviy ko‘maklar bilan ta’minlandi.

📌 Aholi daromadlarini oshirish yo‘nalishida esa 8 620 nafar fuqaro rejalashtirilgan bo‘lsa, amalda 13 382 nafar aholining daromadlarini oshirishga erishildi. Bu ko‘rsatkich 155,2 foizni tashkil etdi.

👥 Norasmiy bandlikni qisqartirish, ya’ni ish o‘rinlarini “soyadan chiqarish” yo‘nalishida ham ijobiy natijalarga erishildi. Rejadagi 2 550 ta norasmiy ish o‘rniga amalda 3 375 ta ish o‘rni qonuniy faoliyatga chiqarilib, reja 132,4 foizga bajarildi.

📊 Doimiy komissiyalar tomonidan hisobot tanqidiy-tahliliy ruhda muhokama qilindi.

Hisobot yuzasidan deputatlar:

🔹 barqaror ish o‘rinlarini yaratish;

🔹 aholi daromadlarini oshirish;

🔹 kambag‘allikni qisqartirish;

🔹 norasmiy bandlikni kamaytirish;

🔹 aholini moliyaviy qo‘llab-quvvatlashning samaradorligi;

🔹 “Mahalla yettiligi” bilan hamkorlikda xonadonbay ishlash

masalalariga alohida e’tibor qaratdilar.

Deputatlar ayrim ko‘rsatkichlarning amaliy ijrosini saylov okruglaridagi real holat bilan solishtirib, mavjud muammolar yuzasidan mas’ullarga savollar berdi. Xususan, norasmiy bandlikni qisqartirish sur’atlari, ajratilayotgan subsidiya va imtiyozli kreditlarning aholi daromadlariga real ta’siri hamda ehtiyojmand oilalar bilan manzilli ishlash samaradorligi yuzasidan tegishli taklif va tavsiyalar bildirildi.

⚖️ Yig‘ilish yakunida deputatlar tomonidan bildirilgan taklif va tavsiyalarni inobatga olgan holda, ko‘rib chiqilgan masala hamda tegishli qaror loyihasini Xalq deputatlari Termiz shahar Kengashining navbatdagi sessiyasi kun tartibiga kiritish belgilandi.

📌 Aholi bandligini ta’minlash, daromadlarini oshirish va kambag‘allikni qisqartirish — deputatlik nazoratining muhim yo‘nalishlaridan biridir.