Ta’lim muassasalarida o‘quvchi-yoshlar uchun qish mavsumida qulay, xavfsiz va issiq shart-sharoitlar yaratish, maktablarning kuz-qish mavsumiga puxta tayyorgarligini ta’minlash masalasi deputatlik nazoratining muhim yo‘nalishlaridan biridir.

Shu maqsadda Xalq deputatlari Termiz shahar Kengashi raisi, 9-“Abdulla Avloniy” saylov okrugi deputati D.Normuradova hamda Kengash kotibiyati bosh mutaxassisi A.Temirov tomonidan shahardagi 11-sonli umumta’lim maktabida nazorat-tahlil tadbiri o‘tkazildi.

Mazkur o‘rganish Oliy Majlis Senati tomonidan mahalliy Kengash deputatlari faoliyati uchun belgilangan “Mahalliy Kengash deputati faoliyatining eng muhim 24 ta yo‘nalishi” mezonlari asosida tashkil etildi.

Xususan, 11-band — ijtimoiy soha obyektlarining kuz-qish mavsumiga tayyorgarligi va isitish tizimi holatini o‘rganish yo‘nalishiga alohida e’tibor qaratildi.

O‘rganish davomida:
🔥 Qozonxona va isitish tarmoqlari — qozonxona uskunalari, nasoslar, bosim o‘lchagichlar hamda isitish quvurlarining texnik holati;
🪟 Issiqlikni saqlash va energiya tejamkorligi — sinfxonalar, sport zali va yo‘laklardagi deraza-romlar, eshik va devorlarning issiqlikni saqlash darajasi;
⚡️ Elektr va yoqilg‘i ta’minoti — elektr va tabiiy gaz tarmoqlarining xavfsizligi, mavsum davomida yuzaga kelishi mumkin bo‘lgan nosozliklarning oldini olish choralari;
🛡️ Yong‘in xavfsizligi — qozonxona va maktab binosidagi yong‘in xavfsizligi vositalarining holati hamda ularning yaroqliligi ko‘zdan kechirildi.
💬 D.Normuradova:
“Farzandlarimiz qishning sovuq kunlarida ham issiq va shinam sinfxonalarda ta’lim olishlari shart. Kuz-qish mavsumiga tayyorgarlik shunchaki rasmiy hisobot uchun emas, balki o‘quvchilarning salomatligi va ta’lim jarayonining uzluksizligini ta’minlashga xizmat qilishi kerak.”
O‘rganish yakunlari bo‘yicha maktab ma’muriyatiga kuz-qish mavsumiga tayyorgarlik ishlarini sifatli yakunlash, mavjud kamchiliklarni bartaraf etish, energiya resurslaridan oqilona va tejamkor foydalanish hamda xavfsizlik talablariga qat’iy rioya etish yuzasidan tegishli tavsiya va ko‘rsatmalar berildi.
📌 Mazkur masalalar kelgusida ham deputatlik nazoratida bo‘lib, maktabning kuz-qish mavsumini betalofat va samarali o‘tkazishi uchun zarur choralar ko‘riladi.