Favqulodda vaziyatlarda aholining to`g`ri harakatlari mavzusida muhim targ`ibot-tashviqot tadbiri o`tkazildi. Mazkur tadbir aholi xavfsizligini ta`minlash, jamiyat barqarorligi va fuqarolarning hayotiy manfaatlarini himoya qilishga qaratilgan davlat siyosatining amaliy ifodasi sifatida tashkil etildi. Tadbirda O`zbekiston Qizil Yarim Oy Jamiyati Andijon viloyat tashkiloti raisi X.Mirzaraximova, tashkilot
mutaxassisi I.Sadovnikova hamda tuman Kengashi deputati Yo.Tadjibaeva ishtirok etdi. Ular o`z ma`ruzalarida favqulodda vaziyatlar — tabiiy ofatlar, texnogen halokatlar va boshqa kutilmagan holatlarda aholining ongli, tizimli va uyushqoq harakat qilishi davlat va jamiyat xavfsizligining muhim omili ekanini ta`kidladilar. Shuningdek, favqulodda vaziyatlarda tezkor va to`g`ri qaror qabul qilish, aholini evakuatsiya qilish tartibi, birinchi tibbiy yordam ko`rsatish ko`nikmalari hamda axborot xavfsizligi masalalari yuzasidan amaliy tavsiyalar berildi. Tadbir yakunida ishtirokchilar tomonidan berilgan savollarga atroflicha javob qaytarildi.