Joriy yilning 23–24 oktyabr kunlari O‘zbekiston Respublikasi Prezidenti Shavkat Mirziyoyev rasmiy tashrif bilan Bryussel shahrida bo‘ldi.
Tashrif doirasida Davlatimiz rahbari Yevropa Ittifoqi rahbarlari, Yevropa Kengashi va Yevropa Komissiyasi yetakchilari bilan qator uchrashuv va
muzokaralar o‘tkazdi.

Bu tashrif ikki tomonlama munosabatlar tarixida muhim siyosiy voqea sifatida e’tirof etilmoqda. Suhbatlarda O‘zbekiston va Yevropa Ittifoqi o‘rtasidagi hamkorlikni yangi bosqichga olib chiqish, “Kengaytirilgan sheriklik va hamkorlik to‘g‘risidagi bitim (EPCA)”ni amalga oshirish, savdo-iqtisodiy, investitsiyaviy va innovatsion sohalardagi munosabatlarni kengaytirish masalalari muhokama etildi.

Prezident Shavkat Mirziyoyev Bryusseldagi muzokaralar chog‘ida Yevropa biznes doiralari va moliya institutlari vakillari bilan ham uchrashdi. Ushbu muloqotlarda qo‘shma loyihalarni amalga oshirish, Yevropa investitsiyasini O‘zbekiston iqtisodiyotiga jalb etish, “yashil energetika”, transport, raqamli iqtisodiyot va ta’lim sohalaridagi hamkorlikni rivojlantirish bo‘yicha aniq taklif va kelishuvlar ilgari surildi.

Tashrif doirasida bir qator ikki tomonlama hujjatlar imzolandi, hamkorlikning yangi yo‘nalishlarini belgilab beruvchi amaliy dasturlar ishlab chiqildi.

Mutaxassislar ta’kidlaganidek, bu tashrif nafaqat O‘zbekiston va Yevropa Ittifoqi munosabatlarini mustahkamlash, balki mamlakatimizning xalqaro nufuzini yanada oshirishga xizmat qiladi. Prezident Mirziyoyevning Yevropa Ittifoqiga rasmiy tashrifi O‘zbekiston tashqi siyosatining ochiqlik va o‘zaro manfaatli hamkorlikka asoslangan yo‘nalishini yana bir bor tasdiqladi.

Babayev Esanbay

Oqoltin tumani Kengashi deputati.