Tadbirda mahalla faollari, nuroniylar, hamda keng jamoatchilik vakillari ishtirok etdi. Uchrashuv davomida deputat tomonidan hisobot davrida amalga oshirilgan ishlar, fuqarolar murojaatlari asosida hal etilgan masalalar, hududni obodonlashtirish, aholi farovonligini oshirish hamda saylovchilar manfaatlarini ta’minlash borasida amalga oshirilayotgan ishlar yuzasidan batafsil ma’lumot berildi.

Ochiq muloqot jarayonida yoshlarni milliy va umuminsoniy qadriyatlar ruhida tarbiyalash, ularda Vatanga sadoqat, qonunga hurmat, yuksak ma’naviyat, fuqarolik mas’uliyati va daxldorlik hissini shakllantirish masalalariga alohida e’tibor qaratildi.

Shuningdek, yoshlar ma’naviy tarbiyasida nuroniylar va keksalarning o‘rni beqiyos ekani alohida ta’kidlandi. Qayd etilganidek, ularning boy hayotiy tajribasi, dono nasihatlari, ibratli hayot yo‘li hamda milliy qadriyatlarga sodiqligi yosh avlodni barkamol inson etib voyaga yetkazishda muhim omil hisoblanadi. Shu bois mahallalarda keksalar va yoshlar o‘rtasidagi uchrashuvlarni muntazam tashkil etish, avlodlar davomiyligini ta’minlash hamda milliy qadriyatlarni yoshlar ongiga chuqur singdirishga qaratilgan ma’naviy-ma’rifiy tadbirlarni yanada kengaytirish zarurligi qayd etildi.

Uchrashuv davomida yoshlarni giyohvandlik, psixotrop moddalar va boshqa zararli illatlardan asrash bugungi kunning eng dolzarb vazifalaridan biri ekani alohida ta’kidlandi. Qayd etilganidek, farzandlarimizni giyohvandlik illatidan himoya qilish – nafaqat davlat organlari, balki oila, mahalla, ta’lim muassasalari, nuroniylar va keng jamoatchilikning umumiy mas’uliyatidir.

Shuningdek, sog‘lom turmush tarzini targ‘ib etish, huquqbuzarliklar profilaktikasini kuchaytirish, yoshlarni turli yot g‘oyalar va zararli illatlar ta’siridan asrash borasida davlat organlari, fuqarolarning o‘zini o‘zi boshqarish organlari, ta’lim muassasalari hamda jamoatchilikning o‘zaro hamkorligini yanada mustahkamlash zarurligi qayd etildi.