Mámleketimizde
sońǵı jıllarda sud-huqıq tarawlarında insanıylıq principlerine tiykarlanıp,
shaxstıń huqıq hám erkinliklerin isenimli qorǵaw, onıń abıroyı, qádir-qımbatın
húrmet qılıw, ayıpsız bolǵan insanlar juwapkershilikke tartılmaslıǵın
támiynlewde bir qatar unamlı isler ámelge asırılmaqta.  

Tilekke
qarsı, házirgi kúnde jınayatlardıń aldın alıw boyınsha keń jámiyetshiligimiz
arasında alıp barılıp atırılǵan úgit-násiyat  

is-ilájlarına
qaramastan jınayatlar sanı hám túri jıldan-jılǵa asıp barmaqta. Olardıń ishinde
xalqımız arasında keńinen islenip atırılǵan ózgeler múlkin jasırın ráwishte
talan-taraj qılıw, yaǵnıy urlıq jınayatı bolıp esaplanadı. 2023-jıl 30-aprel
kúni jańa redakciyada qabıl etilgen, Ózbekstan Respublikası Konstituciyasınıń
65-statyasına muwapıq, puqaralar abadanlıǵın asırıwǵa qaratılǵan Ózbekstan
ekonomikasınıń tiykarın túrli formalardaǵı múlk quraydı. Ózbekstan
Respublikasında barlıq múlk formalarınıń teń huqıqlılıǵı hám huqıqıy tárepten
qorǵalıwı támiynlenedi, bunnan tısqarı jeke múlk qol qatılmas bolıp tabıladı.  

Joqarıda
kórsetilgen nızam talaplarına ámel qılmastan, jámiyette paydalı miynet penen
shuǵıllanbastan, jeńil jol menen pul tabıwdı maqset qılǵanlar sózimizdiń óz
tastıyǵın tabadı.  

Atap
aytqanda, Qaraqalpaqstan Respublikası jınayat isleri boyınsha Taxtakópir rayonı
sudınıń 2025-jıl 16-iyul kúngi húkmine kóre, sudlanıwshı M.S óziniń tanısları
T.A hám S.J penen bir topar bolıp, aldınnan jınayıy til biriktirip, ózgeniń
mal-múlkin jasırın ráwishte urlıq jolı menen talan-taraj etiw arqalı ańsat
jollar menen pul tabıw maqsetin gózlep, 2025-jıl 25-fevral kúninen 26-fevral
kúnine óter túnde puqara N.A nıń kóshe boyında temir setka menen qorshalap, jay
salıw ushın arnalǵan bos jer ornınıń temir setkadan islep, baylap qoyǵan esigin
nızamsız ráwishte ashıp kirip, usı jer ornı ishinde jaylasqan qorasında turǵan
bahası 3.160.000 som bolǵan «gissar» násilli qoyların jınayıy serikleri T.A hám
S.J lar menen birgelikte urlap alıp shıǵıp, puqara J.P tıń basqarıwında bolǵan
avtomashinasına júklep, Qaraózek rayonında jasawshı puqara A.P tıń úyine alıp
kelip, oǵan 4.000.000 somǵa satıp jiberip, puqara N.A ǵa 3.160.000 som
materiallıq zıyan jetkergen.  

Sudtıń
maqul dálilerge súyengen ádil húkmine kóre, sudlanıwshılar M.S, T.A hám S.J lar
Ózbekstan Respublikası JKniń 169-statyası 2-bólimi «v,g» bántleri menen ayıplı
dep tabılıp, olarǵa hár aydaǵı is haqısınıń 20 payızın mámleket paydasına
ótkeriw jolı menen 2 (eki) jıl múddetke dúzetiw isleri jazası tayınlandı.  

Juwmaqlaw
sońında aytıp ótiwimiz lazım, yaǵnıy hár qanday islengen jınayat hám onıń
túrine qaramastan, hár qanday jınayat ushın nızam aldında jazanıń sózsizligin
hám onıń aqıbetiniń unamsız ekenligin ańlap jetiwge hám de urlıq jınayatınıń
jábirleniwshisi yaki qatnasıwshısı bolıwdan saqlanıwǵa shaqıramız. 

Jınayat
isleri boyınsha 

Taxtakópir rayon sudı baslıǵı O.J.Maulenov