Yosh avlodning ilm-fanga, kitobga oshno tutinishi, puxta va mukammal ta’lim olib, yurtimiz kelajagi yo'lida astoydil, sharaf bilan xizmat qiladigan munosib kadrlarni yetishtirib berishda aziz ustoz va pedagoglarimizning o‘rni beqiyos, albatta.

Ana shunday insonlardan biri Nurobodlik ta’lim sohasi fidoyisi, ko‘plab shogird va o‘quvchilarining sevimli ustozi, el-yurt ishonchini, mehrini qozonib kelayotgan Amriddin Hakimovdir.

A.Hakimov 1962-yilning 2-martida Samarqand viloyati, Nurobod tumanida tavallud topgan.

U 1983-yilda Samarqand davlat universitetini matematika fani o‘qituvchisi mutaxassisligi bo‘yicha tamomlagan.

A.Hakimov uzoq yillik mehnat faoliyati davomida ta’lim sohasi rivojiga o‘zining munosib hissasini qo‘shgan inson hisoblanadi.

Jumladan, 1983 – 1984 yillarda Samarqand meva-sabzavotchilik texnikumi tarbiyachisi, 1989 – 1991 yillarda Samarqand tumani 28-maktab matematika fani o‘qituvchisi, 1991 – 1997 yillarda Nurobod tumani 65-maktab matematika o‘qituvchisi, 1997 – 2016 yillarda Nurobod tumani 65-maktab direktori, 2016 – 2022 yillarda Nurobod tumani 13-maktab direktori, 2023-yildan hozirgi kunga qadar Nurobod tumani 13-umumiy o‘rta ta’lim maktabi o‘qituvchisi sifatida yosh avlodning sifatli va mukammal ta’lim olishi yo‘lida mehnat qilib kelmoqda.

Aynan A.Hakimovning mashaqqatli va fidokorona xizmatlarining mevasi o‘laroq, ko‘plab o‘quvchilari Respublikamiz nufuzli OTMlarida tahsil olib, bugungi kunda yurtimiz ravnaqi yo‘lida munosib hissa qo‘shib kelayotgan kadr bo‘lib yetishib chiqmoqda.

Bundan tashqari, tabiatan tashabbuskor va xalq xizmatiga doimo shay bo‘lib kelgan A.Hakimov faqatgina ta’lim sohasidagi faoliyati bilan cheklanib qolmadi, balki bor iste’dodini, kuch-g‘ayratini el-yurt manfaati, farovon turmushi yo‘lida sarflashga bel bog‘ladi.

Shu ezgu maqsadlarni ko‘zlagan holda A.Hakimov 2020-yildan Xalq deputatlari Nurobod tumani Kengashi deputati sifatida faoliyat yuritib kelmoqda.

O‘tgan davr mobaynida Xalq deputatlari tuman Kengashi sessiyalarida faol ishtirok etib, ko‘tarilgan muhim va dolzarb masalalar yuzasidan faollik ko‘rsatgan holda o'z taklif va mulohazalarini bildirib kelmoqda.

Xulosa o‘rnida aytganda, A.Hakimov bugungi kunda ta’lim sohasi faxriysi, hamkasb o‘qituvchilar mehrini, hurmatini qozongan ustoz pedagog, Xalq deputatlari tuman Kengashi deputatlari orasida o‘z so‘ziga, munosib o‘rniga ega bo‘lgan fidoyi insondir.