Xalq deputatlari Qo‘qon shahar Kengashi deputati M.Axmedova tomonidan saylovchilar murojaatlarini o‘rganish hamda hududdagi mavjud muammolarni bartaraf etish maqsadida Qo‘qon shahar Obodonlashtirish boshqarmasi nomiga deputatlik so‘rovi yuborildi.

Deputatlik so‘rovida Qo‘shchinor saylov okrugi hududidagi "Gʻalchasoy" mahalla fuqarolar yig‘inida o‘tkazilgan uchrashuvlar va joyiga chiqib olib borilgan o‘rganishlar davomida aniqlangan Rudakiy hamda Munavvar ko‘chalarining texnik holati bilan bog‘liq muammolar bayon etildi.

Xususan, mazkur ko‘chalarda yo‘l qoplamasi eskirgani, ayrim uchastkalarda transport vositalari va piyodalar harakatlanishi qiyinlashgani, yog‘ingarchilik mavsumida esa fuqarolar uchun jiddiy noqulayliklar yuzaga kelayotgani qayd etildi. Shu munosabat bilan ko‘chalarning texnik holatini mutaxassislar ishtirokida o‘rganish, ularni ta’mirlash imkoniyatlarini ko‘rib chiqish hamda zarur hollarda tegishli dasturlarga kiritish yuzasidan amaliy choralar ko‘rish so‘raldi.

Shuningdek, mas’ul tashkilotdan mazkur murojaat yuzasidan amalga oshiriladigan ishlar, ularning muddatlari hamda ko‘rilgan choralar bo‘yicha asoslantirilgan yozma ma’lumot taqdim etish so‘ralgan.

Mazkur masala deputat nazoratiga olingan bo‘lib, uning ijrosi yuzasidan amalga oshirilayotgan ishlar haqida jamoatchilikka qo‘shimcha ma’lumotlar berib boriladi.

Xalq deputatlari Qo‘qon shahar Kengashi