Buxoro davlat texnika universitetida xalq deputatlari viloyat Kengashi deputatlari hamda ushbu oliy taʼlim muassasasi hamkorligida “Deputat va yoshlar uchrashuvi” oʻtkazildi.

Uchrashuvda xalq deputatlari viloyat Kengashi raisi J.Ashurov talaba-yoshlar huzuridagi oʻz chiqishi davomida mamlakatimiz yoshlariga gʻamxoʻrlik davlat siyosati darajasiga koʻtarilganligini, bunga javoban esa yosh avlod yaratib berilgan sharoitlardan unumli foydalanishi zarurligini tilga olib oʻtdi.

Ayniqsa, kitobxonlikka eʼtibor bugungi kunda har qachongidan koʻra kuchaytirilishi maqsadga muvofiq boʻlib, aynan kitob yigit-qizlarni intellektual jihatdan tarbiyalashning muhim omili ekanligini eʼtirof etdi.

Mamlakatimizdagi peshqadam tadbirkorlardan biri –xalq deputatlari viloyat Kengashi deputati K.Roʻziyev esa yurtimizda keyingi paytda shakllanib qolgan dual taʼlim xususidagi oʻz fikr-mulohazalarini bayon etar ekan, universitet talabalari, ayniqsa bitiruvchilari bandligini taʼminlash uchun uning tasarrufidagi mehmonxonalarda yetarli sharoitlar yaratilganligini, boʻlajak mutaxassislar dual taʼlim imkoniyatlaridan toʻliq foydalanishga ega ekanliklarini maʼlum qildi.

Dual taʼlim mavzusida xalq deputatlari viloyat Kengashi deputati B.Ochilov soʻzni davom ettirildi. U shuningdek, “Xalq bilan birga” umummilliy dasturi borasidagi fikr-mulohazalarini bayon etar ekan, ushbu dasturdan 10 dan ziyod turli sohalarga taalluqli aksiyalar oʻrin olganligini uchrashuv ishtirokchilari eʼtiboriga havola etdi.

Ayniqsa, dasturdagi IT va sunʼiy intellekt texnologiyalaridan foydalanish, veb-dasturlash, kiberxavfsizlik, mobil ilovalar yaratish qaratilgan “IT va sunʼiy intellekt yetakchilari” shiori ostida yoshlar uchun oʻtkaziladigan seminarlar, navqiron avlod vakillarining innovatsion gʻoyalarini roʻyobga chiqarish, ularni tadbirkorlik faoliyatiga keng jalb etish va yangi texnologik yechimlarni ishlab chiqishda qoʻllab-quvvatlash borasidagi “Yoshlarning startap loyihalarini qoʻllab-quvvatlash”, “Kreativ yosh tadbirkor” kabi loyihalari shular jumlasidandir.

Tadbir doirasida universitetning bir qator fakultet va kafedralari tomonidan istiqbolli loyihalar asosida yaratilgan mahsulotlar koʻrgazmasi ham uchrashuv ishtirokchilari eʼtiboriga havola etildi.