Xalq deputatlari Chilonzor tumani Kengashi deputati, XDP a'zosi Ahmedov Shuhrat Murotovich tomonidan fuqarolar murojaatlari va hududdagi mavjud muammolarni o‘rganish davomida “Do‘mbirobod” mahallasidagi avtobus bekatlarining holati yuzasidan muammolar aniqlanib, mas’ul tashkilotlarga deputat so‘rovi yuborildi.
📍 Do‘mbirobod mahallasi, 164-uy oldidagi bekatda yo‘lovchilar uchun zamonaviy va qulay bekat mavjud emas. Aholi yillar davomida yomg‘ir, qor, sovuq va issiq kunlarda transportni ochiq joyda kutishga majbur bo‘lmoqda. Avtobuslarning bekat cho‘ntagiga kirmasdan yo‘l qatnov qismida to‘xtashi, shuningdek, yo‘lovchilarning irrigatsiya lotoklaridan sakrab o‘tishi xavfsizlik bilan bog‘liq muammolarni yuzaga keltirmoqda.
📍 Do‘mbirobod ko‘chasi, 139-uy oldidagi bekat ham ta’mirtalab holatda. Qariyb 50 yildan buyon foydalanib kelinayotgan mazkur bekat tomidagi shiferlar eskirgan bo‘lib, yo‘lovchilarni noqulay ob-havo sharoitlaridan yetarli darajada himoya qila olmayapti.
Deputat so‘rovida 164-uy oldida zamonaviy va xavfsiz avtobus bekatini barpo etish, avtobuslarning xavfsiz to‘xtashi uchun zarur infratuzilmani tashkil etish hamda 139-uy oldidagi bekatni ta’mirlash va tom qismini yangilash masalalari ko‘tarilgan.
Aholi uchun qulay, xavfsiz va zamonaviy transport infratuzilmasini yaratish — deputatlik nazoratining muhim yo‘nalishlaridan biridir.