Tadbirda Zomin tumani Kengashi deputati, tuman hokimi Alisher Abdugʻaniyev, Jizzax viloyati Sog‘liqni saqlash boshqarmasi boshlig‘i Maxmarasul Umarov, Kengash deputati O‘. Oqqulov, Zomin tuman tibbiyot birlashmasi rahbari Shuxrat Tilavberdiyev, tibbiyot xodimlari hamda jamoatchilik vakillari ishtirok etdi.

Ochilish marosimida so‘zga chiqqan tuman hokimi Alisher Abdugʻaniyev mamlakatimizda Prezidentimiz Shavkat Mirziyoyev rahbarligida sog‘liqni saqlash tizimini tubdan isloh qilish, tibbiy xizmatlar sifatini oshirish hamda aholi salomatligini mustahkamlash borasida keng ko‘lamli ishlar amalga oshirilayotganini ta’kidladi.

Qayd etilishicha, aholini profilaktik tibbiy ko‘rik va skrining tekshiruvlariga keng jalb etish, fuqarolarda sog‘lom turmush tarzini shakllantirish hamda yurak-qon tomir kasalliklari, qandli diabet va onkologik xastaliklar profilaktikasi bo‘yicha xabardorlikni oshirish muhim ahamiyat kasb etadi.

O‘zbekiston Respublikasi Sog‘liqni saqlash vazirining 2025-yil 31-oktabrdagi 335-sonli buyrug‘iga muvofiq 2026-yil mart oyida Zomin tumanida “Salomatlik marafoni” ommaviy tadbirlarini o‘tkazish belgilangan.

Mazkur tadbirni yuqori saviyada tashkil etish maqsadida viloyat Sog‘liqni saqlash boshqarmasi, tuman hokimligi hamda Zomin tuman tibbiyot birlashmasi tomonidan zarur tashkiliy chora-tadbirlar amalga oshirildi. Jumladan, marafonni o‘tkazish bo‘yicha “Yo‘l xarita” ishlab chiqilib, tuman ko‘p tarmoqli markaziy poliklinikasida zamonaviy tibbiy asbob-uskunalar joylashtirildi.

Shuningdek, aholi o‘rtasida sog‘lom turmush tarzini targ‘ib qilish maqsadida targ‘ibot materiallari tayyorlanib, marafon davomida fuqarolar ommaviy tibbiy ko‘riklardan o‘tkazilishi hamda zarur hollarda tor soha mutaxassislariga yo‘naltirilishi belgilandi.

Tadbir davomida kirib kelayotgan 8-mart — Xalqaro xotin-qizlar kuni munosabati bilan barcha tadbir ishtirokchilariga gullar taqdim etildi. Shuningdek, tuman madaniyat bo‘limi hamda mahalliy ijodkorlar tomonidan konsert dasturi namoyish etildi.

Mazkur marafonni o‘tkazishdan asosiy maqsad aholi salomatligini mustahkamlash, kasalliklarni erta aniqlash, sog‘lom turmush tarzini keng targ‘ib qilish hamda fuqarolarga sifatli va malakali tibbiy xizmat ko‘rsatishni yanada takomillashtirishdan iboratdir.