Xalq deputatlari Vobkent tumani Kengashi kotibiyati mudiri, deputat M.Naimova tuman Kengashi kotibiyati bosh mutaxassisi Sh.Ismatov bilan birgalikda xalq deputatlari tuman Kengashining navbatdagi sessiya kun tartibiga kiritilayotgan Vobkent tumanida mahallalarning ijtimoiy-iqtisodiy muammolarini hal etish jamgʻarmasi daromadlari va xarajatlarining ijrosi yuzasidan 2026-yil I chorak davomida amalga oshirilgan ishlar yuzasidan Oʻzbekiston Mahallalar uyushmasining Vobkent tumani boʻlimida oʻrganish ishlarini olib bordi.

Oʻrganishlarda, Oʻzbekiston Respublikasi Prezidentining qarori bilan tasdiqlangan “Mahallaning ijtimoiy-iqtisodiy muammolarini hal etish jamgʻarmasi mablagʻlaridan foydalanish tartibi toʻgʻrisida”ni Nizom talablari asosida tashkil etilgan ushbu jamgʻarma hisob-raqamida 2026-yil 1-yanvar holatida jami 877,7 mln.soʻm qoldiq mablagʻ mavjud boʻlib, joriy yilning I chorak mobaynida tumanda jismoniy shaxslardan olinadigan mol-mulk soligʻi va yer soligʻi boʻyicha undirilgan mablagʻlarning 10 foizi yaʼni 326,0 mln.soʻm boʻlgan mablagʻlar jamgʻarmaga kirim qilinib, mavjud 39 ta mahalla fuqarolar yigʻinlarining maxsus hisob-raqamlariga qonunchilikda belgilangan tartibda oʻtkazib berilgan.

Shuningdek, ushbu oʻtkazib berilgan mablagʻlar quyidagi yoʻnalishlarga sarflanishi belgilangan. Xususan:

- mahalla hududidagi ichki yoʻllar, piyodalar yoʻlakchalari, yoritish tizimi, elektr energiyasi hamda tabiiy gaz tarmoqlari, ichimlik va oqava suv tizimini taʼmirlash va tiklash;

- mahalla fuqarolar yigʻini binosi, mahalla hududida joylashgan sport maydoni, nuroniylar choyxonasi, yoshlar markazi, bolalar maydonchasi, kutubxona, madaniyat markazini qurish, mukammal va joriy taʼmirlash hamda ularni inventar, mebel, kompyuter texnikasi va boshqa uskunalar bilan jihozlash;

- ijtimoiy himoyaga muhtoj va kam taʼminlangan oilalarga moddiy koʻmaklashish hamda ularning turar joylarini taʼmirlash va jihozlash;

- mahalla hududida infratuzilmani rivojlantirish, “Yashil makon” umummilliy loyihasi doirasida obodonlashtirish va koʻkalamzorlashtirish ishlarini amalga oshirish va boshqa tadbirlardan iboratligi belgilab berilgan.

2026-yil I choragi davomida tumandagi mavjud boʻlgan mahalla fuqarolar yigʻinlarining taklif va buyurtmalariga asosan jami 321,8 mln.soʻm boʻlgan mablagʻlar “Davlat xaridlari toʻgʻrisida”gi Oʻzbekiston Respublikasining Qonuniga asosan belgilangan tartibda xarajat qilish uchun sarflangan.

Oʻrganishda aniqlangan kamchiliklar yuzasidan masʼullarga tegishli koʻrsatmalar berildi va ularni bartaraf etish boʻyicha aniq vazifalar belgilab olindi.