Aholi uchun munosib yashash sharoitlarini yaratish, ko’p qavatli uylarda sanitariya va xavfsizlik talablariga rioya etilishini ta’minlash maqsadida mahalliy kengash deputatlari M.Atoyeva hamda L.Avezovalar tomonidan uylar yerto’lalarining holati atroflicha o’rganildi.

Guliston mahallasi Shifokor ko’chasida ming nafarga yaqin xalq ko’p qavatli uylarda yashaydi. Tumanimizda 81 ta ko’p qavatli uylar bo’lsa, shundan 14 tasi shu yerda qurilgan.

O’rganish jarayonida ko’p qavatli uylarning yerto’lalarini tozaligi, yoritish tizimi, shamollatish holati, muhandislik kommunikasiyalari — suv, kanalizasiya va elektr tarmoqlarining texnik ahvoli ko’zdan kechirildi. Shuningdek, ayrim hollarda yerto’lalarning noqonuniy foydalanilishi, chiqindilar to’planishi va namlik oqibatida yuzaga kelayotgan muammolarga alohida e’tibor qaratildi.

Deputatlar tomonidan aniqlangan kamchiliklarni bartaraf etish, yerto’lalarni tartibga keltirish, sanitariya holatini yaxshilash hamda aholi uchun xavfsiz muhit yaratish yuzasidan tegishli tashkilotlar va mas’ullarga aniq topshiriqlar berildi.

Shu bilan birga, ko’p qavatli uylardagi yerto’lalardan maqsadli va samarali foydalanish, ularni doimiy nazoratda saqlash hamda tozalik ishlarini muntazam olib borish muhimligi ta’kidlandi.

Aholining farovon va xavfsiz yashashini ta’minlashga qaratilgan bunday o’rganishlar izchil davom ettirilib, mazkur yo’nalishdagi ishlar deputatlar nazoratida bo’ladi.