Xalq deputatlari Zomin tuman Kengashi deputati B.Ergasheva tomonidan hududlarda "Mahalla yettiligi" faoliyati samaradorligini o‘rganish maqsadida navbatdagi monitoring ishlari amalga oshirildi.

O‘rganishlar davomida mahalla fuqarolar yig‘ini raisining hududni kompleks rivojlantirish, aholi murojaatlari bilan ishlash, ijtimoiy muammolarni aniqlash va ularni bartaraf etish borasidagi faoliyati tahlil qilindi.

Shuningdek, ijtimoiy xodimning kam ta'minlangan, boquvchisini yo‘qotgan, nogironligi bo‘lgan hamda ijtimoiy himoyaga muhtoj fuqarolar bilan olib borayotgan ishlari, ularga ko‘rsatilayotgan xizmatlar va manzilli yordamlarning holati o‘rganildi.

Mahalla huquq-tartibot maskani profilaktika inspektorining hududdagi kriminogen vaziyatni barqaror saqlash, huquqbuzarlik va jinoyatlarning oldini olish, fuqarolar xavfsizligini ta'minlash hamda aholi bilan hamkorlikni yo‘lga qo‘yish borasidagi faoliyatiga ham alohida e'tibor qaratildi.

Monitoring yakunida aniqlangan holatlar yuzasidan mas'ullar bilan fikr almashilib, mavjud kamchiliklarni bartaraf etish, xizmatlar sifatini oshirish hamda "Mahalla yettiligi" faoliyatini yanada samarali tashkil etish bo‘yicha tegishli tavsiyalar berildi.