Xalq deputatlari Zomin tuman Kengashi deputati S.Bekmurodova tashabbusi bilan Chorvador mahalla fuqarolar yig‘inining O‘rta qishlog‘ida joylashgan Bibimozor ziyoratgohida amalga oshirilayotgan obodonlashtirish va qurilish ishlarini jadallashtirish maqsadida tadbirkorlar hamda homiylar ishtirokida amaliy ko‘mak ko‘rsatildi.

Deputat tomonidan hududda olib borilgan o‘rganishlar davomida ziyoratgoh infratuzilmasini yaxshilash, mavjud binolarni ta'mirlash va hududni yanada obod etish bo‘yicha bir qator ehtiyojlar mavjudligi aniqlandi. Mazkur masalalarni ijobiy hal etish maqsadida hudud tadbirkorlari va saxovatpesha fuqarolar bilan hamkorlik yo‘lga qo‘yildi.

Ushbu tashabbus natijasida ziyoratgohda olib borilayotgan qurilish ishlari uchun zarur bo‘lgan shifer, stropila va shlakoblok kabi asosiy qurilish materiallari homiylar tomonidan yetkazib berildi. Mazkur qurilish materiallari ziyoratgoh hududidagi qurilish-ta'mirlash ishlarini sifatli va o‘z vaqtida amalga oshirishga xizmat qiladi.

Bibimozor ziyoratgohi hudud aholisining qadimiy ziyorat maskanlaridan biri bo‘lib, uni obod etish, ziyoratchilar uchun qulay va xavfsiz sharoitlar yaratish, tarixiy va ma'naviy merosni asrab-avaylash borasidagi sa'y-harakatlar izchil davom ettirilmoqda.