Xalq deputatlari Toyloq tumani Kengashining Ijtimoiy soha, yoshlar siyosati, madaniyat va sport masalalari bo‘yicha doimiy komissiyasining navbatdagi yig‘ilishida tuman sog‘liqni saqlash bo‘limi boshlig‘i Lola Rustamova tomonidan tuman sog‘liqni saqlash tizimining joriy yildagi faoliyati yuzasidan hisobot eshitildi.

✔️Hisobotda aholiga ko‘rsatilayotgan birlamchi va ixtisoslashtirilgan tibbiy xizmatlar, onalik va bolalikni muhofaza qilish, profilaktik tibbiy ko‘riklar, yuqori texnologiyali jarrohlik amaliyotlari, kadrlar salohiyati hamda tibbiyot muassasalarining moddiy-texnika bazasini mustahkamlash borasida amalga oshirilgan ishlar haqida atroflicha ma’lumot berildi.

✔️Muhokamalar davomida sohada mavjud muammolar, jumladan, ayrim oilaviy poliklinikalarni qayta qurish va ta’mirlash, zamonaviy tibbiy jihozlar bilan ta’minlash, markazlashgan laboratoriya xizmatini tashkil etish hamda kadrlar bilan ta’minlash masalalariga alohida e’tibor qaratildi. Doimiy komissiya a’zolari tomonidan bildirilgan taklif va mulohazalar inobatga olingan holda mazkur hisobotni Xalq deputatlari Toyloq tumani Kengashining navbatdagi sessiyasi muhokamasiga kiritish bo‘yicha tegishli qaror qabul qilindi.