ТАДБИРКОРЛАР ТАШАББУСЛАРИГА АМАЛИЙ КЎМАК
«Маданият» маҳалла фуқаролар йиғини биносида туман ҳокими, Халқ депутатлари Янгиқўрғон тумани Кенгаши депутати Нажмиддинов Асадулла Икромовичнинг ҳудудда фаолият юритаётган тадбиркорлар билан очиқ мулоқоти ўтказилди.
Учрашувда «Ўзсаноатқурилишбанк» АТБ Наманган вилояти филиали бошқарувчиси М. Ғайбуллаев, тегишли ташкилотлар раҳбарлари ҳамда «Маданият» ва «Заркент» маҳаллаларида фаолият юритаётган тадбиркорлар иштирок этди.
Мулоқот давомида янги лойиҳаларни амалга ошириш, мавжуд тадбиркорлик фаолиятини кенгайтириш ва қўшимча иш ўринлари яратишга қаратилган таклиф ҳамда ташаббуслар муҳокама қилинди.
Хусусан, айрим тадбиркорлар қорамолчилик ва қўйчиликни ривожлантириш учун кредит маблағлари ажратилишида амалий кўмак сўради. Шунингдек, пеноблок ишлаб чиқариш фаолиятини кенгайтириш мақсадида қўшимча ер майдони ажратиш ҳамда уй меҳмонхонаси ташкил этиш учун имтиёзли кредит олиш масалалари кўтарилди.
Учрашувда билдирилган ҳар бир таклиф ва мурожаат атрофлича ўрганилиб, уларни қонуний ва ижобий ҳал этиш бўйича мутасаддиларга тегишли вазифалар белгилаб берилди.
📌 Тадбиркорларни қўллаб-қувватлаш, уларнинг ташаббусларини рўёбга чиқариш ва янги иш ўринларини яратишга қаратилган ишлар изчил давом эттирилади.