Xalq deputatlari Qo‘qon shahar Kengashi deputati M.Yunusov tomonidan "Noib ko‘prigi" mahalla fuqarolar yig‘inida shahar Kengashining navbatdagi sessiyasi kun tartibiga kiritilgan “Jinoyatchilikka qarshi kurashish va huquqbuzarliklar profilaktikasi sohasida amalga oshirilayotgan ishlar” masalasi yuzasidan o‘rganish va muhokama o‘tkazildi.

Muhokamada Xalq deputatlari Qo‘qon shahar Kengashi deputati M.Yunusov, Kengash kotibiyati bosh mutaxassislari X.Abdullayev va A.Adhamov, shuningdek, mahalla profilaktika inspektori I.Azimov ishtirok etib, hududdagi kriminogen vaziyat hamda jinoyatchilik va huquqbuzarliklarning oldini olish borasida amalga oshirilayotgan ishlarni atroflicha tahlil qildilar.

O‘rganish davomida mahallada jinoyatchilikning barvaqt oldini olish maqsadida 230 ta ma’muriy ish qo‘zg‘atilgani, shundan 11 tasiga ma’muriy qamoq jazosi tayinlangani hamda 11 nafar xotin-qizga himoya orderi berilgani ma’lum qilindi.

Muhokama davomida mahalla hududida jamoat tartibini mustahkamlash, fuqarolar xavfsizligini ta’minlash, jinoyatchilikka sabab bo‘luvchi omillarni bartaraf etish, videokuzatuv tizimlarini kengaytirish hamda aholi o‘rtasida huquqiy targ‘ibot ishlarini yanada kuchaytirish masalalari ham ko‘rib chiqildi.

Xalq deputatlari Qo‘qon shahar Kengashi