📍 Doimiy komissiya a’zolari bilan yig‘ilish o‘tkazildi

Xalq deputatlari Yakkasaroy tumani Kengashi kotibiyati mudiri Mirkasimov Djasur Alisherovich va Xalq deputatlari Yakkasaroy tumani Kengashining Korrupsiyaga qarshi kurashish hamda xavfsizlik masalalari bo‘yicha doimiy komissiyasi a’zolari ishtirokida yig‘ilish o‘tkazildi.

Mazkur yig‘ilishda hududlarda mavjud holatni chuqur o‘rganish, xususan O‘zbekiston Respublikasi Prezidentining “2025-yilda Respublika mahallalarida xavfsiz muhitni yaratish va huquqbuzarliklarning oldini olish tizimi samaradorligini yanada oshirish bo‘yicha chora-tadbirlar to‘g‘risida” 2025-yil 3-yanvardagi PQ-1-son Qarori hamda O‘zbekiston Respublikasi Oliy Majlisi Senati Kengashining 2025-yil 14-yanvardagi KQ-35-V-son qarori ijrosining borishi atroflicha muhokama qilindi.

📄 Yig‘ilish davomida ushbu normativ-huquqiy hujjatlar ijrosini samarali tashkil etish, hududlarda huquqbuzarliklarning oldini olish, jinoyatchilikni kamaytirish hamda aholi uchun xavfsiz muhitni shakllantirish bilan bir qatorda korrupsiya holatlarini oldini olish, uning kelib chiqish sabablarini aniqlash hamda korrupsiyaga barham berish masalalariga alohida e’tibor qaratildi.

Shu bilan birga, mahallalarda profilaktik ishlarni kuchaytirish, tegishli tashkilotlar o‘rtasida hamkorlikni mustahkamlash, korrupsiyaviy omillarni bartaraf etish, shuningdek aholi bilan ishlash tizimini yanada takomillashtirish zarurligi ta’kidlandi.

📃 Shuningdek, komissiya a’zolari tomonidan o‘zlariga taalluqli qonunlar doirasida hududlardagi tashkilotlar faoliyatini joyiga chiqib o‘rganish, mavjud kamchilik va muammolarni aniqlash, shu jumladan korrupsiyaga sabab bo‘layotgan omillarni tahlil qilish hamda ularni bartaraf etish yuzasidan aniq chora-tadbirlar ishlab chiqish belgilab olindi.

✍️ Monitoring natijalariga asosan tegishli taklif va tavsiyalar tayyorlash, korrupsiyaga qarshi kurashish samaradorligini oshirish hamda ularning ijrosini nazoratga olish bo‘yicha vazifalar yuklatildi.

✅ Yig‘ilish yakunida belgilangan vazifalarni o‘z vaqtida va sifatli bajarish, hududlarda qonun ustuvorligini ta’minlash, korrupsiyaga qarshi murosasiz kurashish hamda xavfsiz muhitni yaratish borasidagi ishlarni izchil davom ettirish muhimligi qayd etildi.