Xalq deputatlari Qo‘qon shahar Kengashining "Ijtimoiy soha, yoshlar siyosati, madaniyat va sport masalalari bo‘yicha" doimiy komissiyasi tomonidan navbatdagi yig‘ilish o‘tkazildi.

Yig‘ilish kun tartibida O‘zbekiston Respublikasining “Aholining sanitariya-epidemiologik osoyishtaligi to‘g‘risida”gi O‘RQ–393-sonli Qonuni ijrosini ta’minlash hamda ushbu yo‘nalishda amalga oshirilayotgan ishlar samaradorligini oshirish masalasi ko‘rib chiqildi.

Mazkur masala yuzasidan Sanitariya-epidemiologik osoyishtalik va jamoat salomatligi xizmati Qo‘qon shahar bo‘limi boshlig‘i o‘rinbosari U.Ismoilovning hisoboti tinglandi.

Hisobotda ta’kidlanganidek, aholi salomatligini muhofaza qilish, sanitariya-gigiyena talablariga rioya etilishini ta’minlash hamda yuqumli kasalliklarning oldini olish maqsadida shahar hududida muntazam ravishda nazorat tadbirlari va profilaktik o‘rganishlar olib borilmoqda.

O‘tkazilgan nazorat tadbirlari davomida amaldagi qonunchilik talablarini buzgan mas’ul va jismoniy shaxslarga nisbatan belgilangan tartibda 46 ta ma’muriy bayonnoma rasmiylashtirilgani ma’lum qilindi.

Yig‘ilish yakunida komissiya a’zolari tomonidan sanitariya-epidemiologik osoyishtalikni ta’minlash, aholi salomatligini muhofaza qilish va sanitariya-gigiyena talablariga rioya etilishi ustidan nazoratni yanada kuchaytirish yuzasidan tegishli tavsiya va topshiriqlar berildi.

Shuningdek, ushbu masala yuzasidan doimiy komissiya tomonidan joylarda qo‘shimcha o‘rganishlar o‘tkazish hamda qonun ijrosi ustidan deputatlik nazoratini kuchaytirish belgilab olindi.

Xalq deputatlari Qo‘qon shahar Kengashi