Dehqonobod tumanida 24 nafar istiqlol farzandining sunnat toʻylari oʻtkazildi

Oʻzbekiston Respublikasi mustaqilligining 34 yillik tantanalari yurtimiz boʻylab keng nishonlanmoqda. Ayniqsa, Dehqonobod
tumanida tashkil etilgan ijtimoiy-maʼnaviy tadbirlar xalqimizga bayramona kayfiyat ulashmoqda. Yaqinda tuman hududidagi ehtiyojmand oilalarning 24 nafar farzandi uchun oʻzgacha ruhda sunnat toʻylari oʻtkazildi. 

  Tashkilotchilarning maqsadi — nafaqat bayramni keng nishonlash, balki jamiyatda mehr-oqibat va hamjihatlik tamoyillarini
mustahkamlash edi. “Vatan uchun, Millat uchun, Xalq uchun!” degan ezgu shior ostida oʻtkazilgan tadbir Xalq deputatlari Dehqonobod tuman kengashi deputati, tadbirkor Abbos Jumayev homiyligida amalga oshirildi. 

  Farzandlari sunnat to‘yiga sazovor boʻlgan ota-onalar ushbu xayrli ishni alohida qadrlab, davlatimiz rahbariyatiga,
tashabbuskorlarga samimiy minnatdorliklarini bildirishdi: 

— Bu kabi tadbirlar xalqimizning ogʻirini yengil qilishga xizmat qiladi. Ayniqsa, bolalarimizning yuzidagi quvonch — eng katta
baxtimiz. Prezidentimiz va mehr-oqibatli insonlarga rahmat, — deydi to‘y bolalaridan birining onasi.   

Marosimda tuman hokimi, Xalq deputatlari tuman Kengashi raisi Sherzod Shokirov ham ishtirok etib, yigʻilganlarni bayram bilan muborakbod etdi. Shuningdek, homiylik qilgan Abbos Jumayevga tuman hokimligi nomidan minnatdorchilik bildirdi.