Bugun “Payshanba — Yoshlar kuni” doirasida Sardoba tumanida yoshlar uchun “Ochiq eshiklar kuni” tashkil etildi.
Tadbir davomida yoshlar Sardoba tumani hokimligiga tashrif buyurib, hokimlik tizimida olib borilayotgan ishlar, davlat boshqaruvi jarayonlari hamda xodimlarning kundalik faoliyati bilan yaqindan tanishdilar.
Shuningdek, yoshlar uchun tuman hokimi deputat Ziyadulla Karimov bilan xizmat xonasida samimiy va ochiq muloqot tashkil etildi. Suhbat davomida yoshlarni qiziqtirgan savollar, ularning taklif va tashabbuslari, kelgusidagi maqsadlari haqida fikr almashildi.
Muloqotning eng esda qolarli lahzalaridan biri esa kelajakda hokim bo‘lishni niyat qilgan yoshlarimizdan biriga tuman hokimining ish stoliga o‘tirib, hokimlik faoliyatini o‘ziga xos tarzda his etish imkoniyati berilgani bo‘ldi.
Bunday ochiq muloqot va amaliy tashriflar yoshlarning davlat boshqaruvi tizimiga bo‘lgan qiziqishini oshirish, ularning liderlik va tashabbuskorlik fazilatlarini rivojlantirishga xizmat qiladi.