2025-yilning sentabr oyi boshida G‘azira
mahallasida joylashgan 11-maktabda yuksak ma’naviy-ma’rifiy ruhda o‘tgan
uchrashuv barcha ishtirokchilarda iliq taassurot qoldirdi. Ushbu muhim tadbirda
xalq deputatlari Jomboy tuman Kengashi deputatlari Toshpulatov Arslon Axror o‘g‘li va Turayev Nodir Nasurllayevich ishtirok etib,
11-sinf o‘quvchilari bilan ochiq va samimiy suhbat o‘tkazdi. 

Uchrashuv
davomida deputat yoshlarga bugungi kunda ta’lim olgan holda, Vatanga, jamiyatga
xizmat qilish, bilimli va faol fuqaro bo‘lib yetishishning ahamiyati haqida
chuqur fikrlar bildirdi. U yoshlar bilan muloqot davomida ularning
orzu-umidlari, hayotga bo‘lgan qarashlari bilan yaqindan tanishdi va o‘zining
tajriba va maslahatlarini ulashdi. 

Tadbirning eng esda qolarli lahzalaridan biri –
o‘quvchilarga kitoblar sovg‘a qilinishi bo‘ldi. Deputat tomonidan maktab
kutubxonasi hamda o‘quvchilarga shaxsiy foydalanish uchun 10 dan ortiq badiiy va ma’rifiy kitoblar tuhfa etildi.
Ushbu kitoblar orasida o‘zbek va jahon adabiyotining durdonalari, zamonaviy
o‘quvchilarning ma’naviyatini boyituvchi asarlar, shuningdek, yoshlarga
motivatsiya beruvchi kitoblar bo‘ldi. 

Deputat o‘z nutqida shunday dedi: 

“Kitob – insonni ma’rifatga yetaklaydi. Bugungi
yoshlar ertangi kunimizning bunyodkorlari. Sizlar ko‘proq o‘qing, izlanuvchan
bo‘ling, orzu qiling – biz sizga ishonamiz!” 

Maktab jamoasi va o‘quvchilar ushbu tashrifdan mamnun
bo‘lib, deputatga o‘z minnatdorchiliklarini bildirdilar. Maktab direktori va
ustozlar bu kabi tashriflar yoshlarning bilim olishga, o‘z ustida ishlashga
bo‘lgan ishtiyoqini oshirishini ta’kidlashdi. 

Tadbir yakunida esdalik suratlari olinib, yoshlar
bilan do‘stona suhbat davom etdi. Bu uchrashuv maktab hayotida muhim voqea
sifatida qayd etildi va ko‘plab o‘quvchilarga yangi orzu va maqsadlar sari
dadil qadam tashlash ilhomini berdi.