Joriy
yilning 13–14-aprel kunlari Oliy Majlis huzuridagi Fuqarolik jamiyati
institutlarini qo‘llab-quvvatlash jamoat fondi mablag‘larini boshqarish
bo‘yicha Parlament komissiyasi aʼzolari tomonidan Namangan viloyatining bir
qancha tumanlarida ijtimoiy muammolarni o‘rganish ishlari amalga oshirildi. 🏛 

Ushbu
o‘rganishlar “Fuqarolik jamiyati institutlarini davlat tomonidan
qo‘llab-quvvatlash tizimini yanada takomillashtirish chora-tadbirlari
to‘g‘risida”gi Farmon ijrosi doirasida tashkil etilgan. Komissiya aʼzosi
senator Odiljon Mamatkarimov hamda hududiy jamoat fondi xodimlaridan iborat
ishchi guruh tomonidan Uchqo‘rg‘on tumanida o‘rganishlar olib borilib,
hududlardagi mavjud muammolar, aholini qiynayotgan dolzarb masalalar hamda
ijtimoiy sohadagi kamchiliklar chuqur tahlil qilindi. 📊 

O‘rganishlar
davomida aniqlangan muammolarni tizimli hal etish, fuqarolik jamiyati
institutlari faoliyatini yanada qo‘llab-quvvatlash, ularning tashabbuslarini
rag‘batlantirish hamda samarali loyihalarni davlat grantlari va davlat ijtimoiy
buyurtmalari orqali moliyalashtirish masalalariga alohida eʼtibor qaratildi.
Shuningdek, mahallalar infratuzilmasini yaxshilash, aholi turmush darajasini
oshirish, yoshlar va xotin-qizlar bandligini taʼminlash, atrof muhitni muhofaza
qilish kabi ustuvor yo‘nalishlar yuzasidan takliflar ishlab chiqildi. 🤝 

O‘rganishlar
yakunlari bo‘yicha hududlardagi real ehtiyojlardan kelib chiqib, ijtimoiy
ahamiyati yuqori bo‘lgan loyihalarni qo‘llab-quvvatlash, ularni davlat
grantlari asosida moliyalashtirish hamda amaliyotga joriy etish yuzasidan
tegishli choralar ko‘rilishi belgilandi.