Jaqında Hindstannıń "PHD Chamber of Commerce and Industry" (PHD CCI) maydanında Ózbekstan elshixanası tárepinen mámleketimizdiń sawda-ekonomikalıq hám investiciyalıq imkaniyatlarına baǵıshlanǵan dógerek sáwbeti bolıp ótken edi. Bul xalıqaralıq ilaj tikkeley Qaraqalpaqstannıń sawda-ekonomikalıq hám investiciyalıq potencialına baǵıshlandı hám Hindstannıń 20 dan aslam jetekshi kompaniyalarınıń basshıları hám wákilleri qatnastı. Tiykarǵı maqset Qaraqalpaqstan Respublikasında isbilermenlik jumısın júrgiziw ushın usınılıp atırǵan siyrek ushırasatuǵın imkaniyatlar haqqında boldı.

Prezidentimiz tárepinen sırt el investiciyaların tartıw baǵdarında mámleketimizde investorlar ushın jaratılıp atırǵan imkaniyatlar, qosımsha bajıxana jeńilliklerin názerde tutatuǵın arnawlı huqıqıy rejim, tayar infrastrukturaǵa ie arnawlı ekonomikalıq zonalar hám sanaat parklerinde kárxanalar shólkemlestiriw imkaniyatları, jer ijarasınıń jeńilletilgen shártleri hám joybarlardı mámleket tárepinen hár tárepleme qollap-quwatlaw, sonıń ishinde, investiciyalardı qorǵaw kepilliklerine de toqtap ótti. Qosımsha bul joybarlardı ámelge asırıwda toqımashılıq sanaatı, farmacevtika hám medicinalıq ásbap-úskeneler islep shıǵarıw, málimleme texnologiyaları, ximiya sanaatı, jasıl energetika hám turizm tarawların belgilep alǵan edi.

Bunnan kelip shıǵıp, elimizdiń qay dárejede hár tárepleme rawajlanıp atırǵanlıǵın, qalaberse, bunıń ayqın dálili tikkeley Qaraqalpaqstan Respublikası ushın Prezidentimizdiń usı kúnge shekem qabıl etken Párman hám qararlarınıń, baslı reformalardıń izbe-iz dawamı desek boladı. Bul xalıqaralıq birge islesiw arqalı mámleketimizde isbilermenlerimizdiń sanın jáne de arttırıp, jańa jumıs orınlarınıń jaratılıwına da sebep boladı.

Bul ámeliy hám maqsetli jumıslar Respublikamız xalqınıń keleshegi ushın oǵada áhmietli esaplanıp, xalqımız juwap retinde tınıshlıq, tatıwlıqtı, awızbirshilikti, doslıqtı bekkemlew hám jańa reformalarǵa ámeliy is penen juwap beriwinde dep oylayman.

Rayxan KARMISOVA, 

Xalıq deputatları Qaraózek rayonlıq Keńesi deputatı, ÓzXDP deputatlıq toparı baslıǵı