Aholiga madaniy xizmatlar ko‘rsatish
masalalari o‘rganildi 

Aholi, ayniqsa, olis hududlarda istiqomat
qiladigan fuqarolarga madaniy dam olish xizmatlari ko‘rsatish darajasini oshirish,
respublika miqyosida teatr, sirk va turli ommaviy-madaniy tadbirlarni tizimli yo‘lga
qo‘yish, iste’dodli yosh ijodkorlarni izlab topish va qo‘llab-quvvatlash hamda ta’lim
muassasalarini milliy cholg‘ular, musiqa darsliklari va o‘quv-metodik adabiyotlar
bilan ta’minlash — bugungi kunda davlat siyosatining muhim yo‘nalishlaridan biri
hisoblanadi. 

Shu maqsadda tuman Kengashining “Ijtimoiy
soha, yoshlar siyosati, madaniyat va sport masalalari bo‘yicha doimiy komissiya”
raisi, deputat Ozodaxon Dadajonova hamda deputat Shuxratjon Raximov
Mehnatobod MFY hududidagi 67-sonli “Istiqlol madaniyat markazi”da o‘rganish ishlarini
olib bordilar. 

O‘rganish davomida markazda faoliyat
yuritayotgan xodimlar bilan aholi madaniy ehtiyojlarini chuqur tahlil qilish, turli
ma’naviy-ma’rifiy va ko‘ngilochar xizmatlar ko‘lamini kengaytirish, havaskorlik
va amaliy san’at yo‘nalishlarini rivojlantirish uchun zarur shart-sharoitlar yaratilishi
bo‘yicha muloqot tashkil etildi. 

Shuningdek, markaz hududida olib borilayotgan
qurilish, ta’mirlash va ko‘kalamzorlashtirish ishlari ham o‘rganilib, kelgusida
aholiga yanada munosib madaniy xizmatlar ko‘rsatish uchun qo‘shimcha taklif va tavsiyalar
berildi. 

Mazkur tashrifdan maqsad aholi, ayniqsa,
yoshlarning ma’naviy va madaniy ehtiyojlarini qondirish, ularning iste’dodini ro‘yobga
chiqarish va madaniy hayotdagi ishtiroki uchun yanada keng imkoniyatlar yaratish
bo‘yicha takliflarni berishdir.