Xalıqtıń mashqalaların sheshiwde "máhálle jetiligi" - rayon (qala) Keńesi - wálayat Keńesi - Senat" principi

Bárshemizge belgili, búgingi kúnde elimizde jergilikli wákillikli uyımlardıń jumısın tásirsheń hám nátiyjeli shólkemlestiriw mámleketlik siyasattıń tiykarǵı baǵdarlarınan biri bolıp esaplanadı.

Jergilikli Keńeslerdiń aymaqlardı sociallıq-эkonomikalıq rawajlandırıw hám xalıqtıń mashqalaların sheshiw boyınsha wákillikleri keńeyip barmaqta.

Búgingi Párman menen tastıyıqlanǵan Ózbekstanda jergilikli mámleketlik hákimiyat wákillikli uyımlarınıń jumısın 2030-jılǵa shekem rawajlandırıw Koncepciyası jergilikli Keńeslerdiń jumısın nátiyjeli shólkemlestiriwge qaratılǵan reformalardıń izbe-iz dawamı bolıp esaplanadı.

Koncepciyada aymaqtı rawajlandırıwǵa baylanıslı máselelerin hám xalıq tárepinen kóterilip atırǵan mashqalalardı sheshiw boyınsha jergilikli Keńeslerge jáne de keńirek imkaniyatlar berilmekte.

"Máhálle jetiligi" - rayon (qala) Keńesi - wálayat Keńesi - Senat" principi jolǵa qoyılıwı, onda aymaqlardı rawajlandırıw baǵdarlamalarınıń orınlanıwın deputat hám "máhálle jetiligi" qadaǵalap barıw tártibi belgilendi.

Búgingi kúnde, bul ámeliyat tájiriybe túrinde jolǵa qoyılǵan, endi bul tájiriybe jáne de jetilistiriledi hám keń kólemde hám sistemalı túrde iske túsiriledi.

Onda deputatlar óz okrugindegi "máhálle jetiligi" wákilleri menen birgelikte baǵdarlamada belgilengen wazıypalardıń ámelge asırılıwın mánzilli úyrenip, olardıń sheshimi boyınsha birgelikte háreket etedi. Jergilikli Keńesler de óz gezeginde deputatlar tárepinen usınılǵan mashqala hám usınıslardı úyrenip, olardı sheshiw boyınsha tiyisli ilajlar kóredi.

Xalıq deputatları Bozataw rayonlıq Keńesi deputatlarıda usı reformalardı ámelge asırıwda belsene qatnasıwǵa, xalıqtıń pikiri hám máplerin qorǵawǵa óz úlesin qosatuǵınlıǵına isenemen.