Usı Párman menen tastıyıqlanǵan Koncepciya jergilikli Keńeslerdiń jumısın bunnan bılay da jetilistiriw menen birge xalıq deputatlarına mámleketlik hám jámietlik turmıstaǵı áhmietli máselelerdi sheshiw, jergilikli mámleketlik uyımlar wákilleriniń xalıq aldındaǵı juwapkershiligin jáne de arttırıwǵa xızmet etedi;

Unamlı nátiyje kútilip atırǵan máselelerden biri sıpatında, usı Koncepciyada óz kórinisin tapqan, hákim orınbasarlıǵına usınıs etilip atırǵan talabanlardıń jergilikli Keńes komissiyasına óz baǵdarlamasın usınıwın aytıw múmkin. Bunda, talabanlardıń aymaqtıń mashqalaların tereń biliwi hám olardıń sheshimin óz waqtında ámelge asırıwdı támiyinley alıwı úlken áhmietke iуе boladı hám olarǵa úlken juwapkershilik júkleydi;

Párman menen jergilikli mámleketlik hákimiyat uyımlarınıń jumısın jańa model - "Kúshli Keńes, esaplı hám intaker hákim" principi tiykarında reformalawǵa qaratılǵan bir qatar qaǵıydalar búgingi kúnniń áhmietli talaplarınan bolıp esaplanadı. Qalaberse, bul princip xalıq hákimiyatshılıǵın jańa basqıshqa alıp shıǵıwǵa xızmet etedi;

Jergilikli Keńesler deputatlarınıń statusı hám jumısınıń tiykarǵı kepilliklerin jáne de kúsheytiw arqalı olardıń tiykarǵı jumıs ornı boyınsha jumıs beriwshilerdiń juwapkershiligin arttıradı. Bul bolsa deputatlarǵa júklengen wazıypalardı tolıq hám nátiyjeli jolǵa qoyıwǵa sharayat jaratadı;

Bul normativlik-huqıqıy hújjet arqalı jergilikli mámleketlik hákimiyat uyımların "xalıq máplerine xızmet etiw" principiniń tiykarǵı buwını hám mexanizmine, sonday-aq, xalıqtıń erkı-ıqrarın bildiretuǵın institutqa aylanatuǵınına úmit etemen.

A.Ibragimov
Xalıq deputatları Bozataw rayonlıq
Keńesi Sekretariat baslıǵı