Chorshanba kuni yakunlangan IV Toshkent xalqaro investitsiya forumi O‘zbekiston iqtisodiy ochiqlik va institutsional islohotlar yo‘lidan dadil borayotganini yana bir bor tasdiqladi. Umumiy qiymati 30,5 milliard dollarga teng bo‘lgan kelishuv va memorandumlar nafaqat miqdoriy yutuq, balki xalqaro maydonda mamlakatni idrok etishdagi sifat o‘zgarishlarining ifodasidir. 2022-yildan buyon o‘tkazilgan avvalgi uchta forum davomida umumiy qiymati 44 milliard dollarlik 357 ta investitsiya shartnomasi imzolangandi.

Tadbirda 8 mingdan ziyod biznes, investorlar va xalqaro tuzilmalar vakillari, jumladan, 3 mingdan ortiq xorijlik ishtirok etayotgani O‘zbekistonga uzoq muddatli sheriklik maydoni sifatida barqaror qiziqish mavjudligidan dalolat beradi. Ta’kidlash joizki, forum imij tadbiri bo‘lishdan to‘xtab, shartnomalar tashriflar ortidan emas, balki davlat va investor o‘rtasida o‘rnatilgan aloqa tizimi doirasida amalga oshiriladigan ish mexanizmiga aylanmoqda.